[A:853]ga gdan sa gong gi gdung rabs/ sgar chen mthu stobs dbang phyug yan chad/ 'jam mgon kun blo'i gdung rabs zhal skong rin chen 'dzad med bzhin dang/ de mtshams sa chen rdo rje 'chang kun dga' blo gros nas deng sang gi bar kho bos sbyar ba'i gdung rabs 'di nang bzhin/ gong a mes zhabs kyi gdung rabs sa bcad bzhin bla brang rnam bzhi'i gdung rabs rnams kyi nang nas/ dus mchod bla brang pa'i gdung rabs da lta bar byon pa dang/ ma 'ongs pa na 'byon par 'gyur ba'i tshul bcas legs par bstan zin nas/ 'dir smras pa/ ngo mtshar dus su ngoms pa'i gdung rigs rnams/ /ngo mtshar mdzad 'phrin du ma ston bzhin du/ /ngo mtshar bstan dang 'gro ba'i dpal gyur pa/ /ngo mtshar phul byung de las gzhan du ci/ /khyad par nor bu'i dbus na dgos 'dod 'byung / /rkang gnyis dbus na de bzhin gshegs pa ltar/ /kun gyi nang na rgyal mtshan ltar mdzes pa/ /sa chen kun blo'i rnam thar bsam gyin dad/ /gzhan yang 'gro mgon dbang gi mtshan can sogs/ /bsam bzhin rnam 'phrul bgrangs yas ston mdzad nas/ /rgyal bstan rin chen phyogs brgyar spel mdzad pa/ /kun la bdag yid dad pas lag pad zum/ /snyigs ma'i dus 'dir rgyal bstan 'dzin pa dkon/ /dkon mchog dbu 'phang smod pa'i gang zag mang/ /mang por bdud kyi mda' lngas snying la bsnun/ /bsnun pa phal cher zog po'i rdzun gyis bslus/ /drang po'i zol gyis gnas rnams yid pham pham/ /