[A:857]mdzad/ chu yos rgyal zla nas de sras rdo rje rin chen gyis khri thog lo gsum mdzad/ me rta rgyal zla nas shing glang zla ba bcu pa'i bar lo grangs nyi shu tham pa theg chen bkra shis rin chen gyis bdag khri mdzad/ me stag rgyal zla nas rab byung bco lnga pa'i chu rta zla ba bzhi pa'i bar lo bcu bdun bdag khri kun dga' bsod nams kyis mdzad pas mjug lo gcig cung med/ chu lug rgyal zla nas sa phag zla ba bcu gcig pa'i bar lo grangs bcu bdun bdag khri yab rje rdo rje 'chang kun dga' snying pos mdzad pas mjug lo gcig cung ma tshang / lcags glang rgyal zla nas shing yos zla ba bcu pa'i bar lo grangs bco lnga bdag khri 'jam dbang nas mdzad/ de nas dgongs zhu mdzad nas shing yos rgyal zla nas/ da lta rab byung bcu drug pa'i chu sprel snron zla phyi ma'i tshes gcig 'di yan la ngos rang nas sa bstan 'khur 'dzin bgyis nas lo grangs bcu bdun dang/ shing yos 'go zla nas brtsis na lo grangs bco brgyad ma song tsam du slebs pa bcas kyi sa bcad lnga pa skabs kyi don gdan sa chen po'i 'di nyid du da phan gdan rabs ji ltar byung tshul gyi zhal skong bshad zin to/ /yang smras pa/ phun tshogs rigs gsum mgon po'i rnam sprul pa/ /phun tshogs mtshan gsum gdung rigs ngo mtshar can/ /phun tshogs gdan rabs ji ltar byung ba'i tshul/ /phun tshogs gang gis smra de sa gsum rgyal/ /zhes kyang smras so/ /
de rnams kyi dpal sa skya'i gdung rabs rin po che byon tshul rin chen