[A:51a]te/ de ni 'khor ba thog ma med pa la dgongs so/ /yang ji tsam na dwangs par 'gyur gsungs pas/ 'khor ba ma stong gi bar du nad las mi thar gsungs/ de ni 'khor ba la tha ma med pa la dgongs so/ /de nas yang 'jam dpal gyis yang dag pa'i don ji lta bu lags zhus pas ci yang mi gsungs/ lan gnyis lan gsum gyi bar du dris pas kyang ci yang mi gsungs so/ /de ni don dam smra bsam brjod du med pa la dgongs te/ rgyal ba'i sras po cang mi gsungs/ /mi gsungs pas ni rgya cher bshad/ /ces gsungs pa'i don yin no/ /de lta bu'i dge bsnyen chen po de gsang sngags rdo rje theg pa ltar na blo gros rin chen zhes bya ba sa bcu pa'i byang chub sems dpa'i tshul bzung ba zab mo'i don thugs su chud pa mgon po 'jam pa'i dbyangs kyi sprul pa che ba'i yon tan dpag tu med pa dang ldan pa zhig yin te 'dir mdo tsam mo/ /de lta bu'i byang chub sems dpa' chen po dga' ldan gyi lha'i bu blo gros rin chen gyis 'dzam bu'i gling du gsang ba 'dus pa'i gdams pa sbyin pa'i gdul bya yod dam med snyam du dgongs nas gzigs pas/ sa ra ha dang klu sgrub gnyis snod ldan du gzigs nas de gnyis la gdams/ de gnyis kyi nang nas klu sgrub kyis ma taM gi pa la gnang / des grub chen tai lo pa la stsal pa yin te/ de yang tai lo pa ni dang po rab tu byung / de nas rje btsun mas byin gyis brlabs te sngags dang pha rol tu phyin pa'i don phyin ci ma log par rtogs shing / de nas klu sgrub 'tshol du phyin pas/