[A:71a]yon tan rgya mtsho sku na bgres por song ba des/ bu ston rin po che'i dgongs bzhed ltar zha lur byon nas/ bu ston rin po che la khyed la rgya ba'i rgya lugs dang gar ba'i gar lugs nas dgos pa'i lugs min/ bshar te bklags la skabs skabs su 'gag re tsam bshad de chos thob che bar byed pa yin no gsungs pa la/ bu ston rin po ches/ de 'dra'i lung thob tsam gyis mi phan/ bshad pa rdo rus thug pa lag len dang bcas pa zhu 'tshal zhus pas/ 'phags 'od kyi zhal nas/ 'a pa yes snying nas rang gsang 'dus shes pa cig bzhed dam gsungs/ shin tu 'dod lags zhus pas/ 'o na gsang 'dus kyi don rim lngar 'dus pa yin/ rim lnga'i khrid bzang po zhig thob na gsang 'dus kyi don rang rdol la yong bas thog mar dbang dang khrid byed dgos gsungs nas dbang bka' bdun po gcig tu 'dus pa'i dbang bka' rgyas pa mdzad nas de nas 'dus pa'i rim lnga smar khrid dgun stod la rdzogs par mdzad de/ slar dpyid ka rdog lugs/ mar lugs/ jo bo lugs/ chag lugs rnams kyi bshad bka'/ lung bka'/ man ngag gi bka' thams cad legs par stsal ba yin no/ /de ltar bu ston rin po ches 'phags 'od la legs par gsan nas bstan pa'i khur chen po bzhes te/ 'dus pa la yig cha yang / sgron gsal gyi rnam bshad mtha' drug rab gsal/ 'dus pa'i sgrub thabs dngos grub char 'bebs/ bstod pa byin rlabs char 'bebs/ gtor chog 'dod don char 'bebs/ dkyil chog ye shes char 'bebs/