[A:75b]pa'i bu bzhi'am/ ka chen bzhi zhes grags te/ snga ma gsum gyis bde kye sogs bshad pa'i srol bzung / mid las bka' babs bzhi'i gi gdams pa'i bcud sgrub pa'i srol bzung ba yin no/ /gzhan yang chu gong dpal le/ dri ma'i bu chung / dol pa bdag ston/ dge bshes gad pa bzhi la bka' babs bu bzhi zhes dang / 'dam gyi mar mi mgo legs/ dger phu'i klog skya jo sras/ 'phan yul nya ma dpal mo/ rkyang ro zhang ston bzhi la las can gyi slob ma bzhi zhes bya zhing / de rnams kyi nang nas tshur ston dbang gi rdo rje la 'dus pa'i dbang rgyud man ngag dang bcas pa gdams pa ni deng sang gi bar du dar rgyas su yod pa 'di nyid yin la/ de yang tshur ston 'di mthu la shin tu mnga' brnyes pa zhig yin pas mthu'i sgo nas mi mang po bsad pa la 'gyod pa skyes nas/ mar pa la sdig po che btsan thabs su sangs rgya ba'i gdams pa yod zer ba thos te zhu ru phyin te/ de'i dus su mar pas pha spun kha cig la dbang bskur ba'i phyag rgya mo mdzad pas/ nged kyi mi dma' phab zer nas bla ma mar pa'i grwa pa'i rta la mda' brgyab/ rta rdzi brdungs/ 'o dod 'bod du bcug pas/ bla ma mar pa thugs khros te zhal nas/ ngas rgya gar du sangs rgya ba'i gdams pa min pa/ bstan srung rang mi dgos snyam nas mthu sogs ma zhus pa yin na'ang / da ngan pa 'di tsho'i sdig gsog du 'ong ba 'dug pas/ nga snub zam nag pa can du mthu zhu ru 'gro bas khyed rang tsho gyes shig gsungs pa la/ tshur ston gyis ku re ma lags sam/ mthu dgos na bdag gis bgyi'am zhus pas/ 'o na gyis shig gsungs