[A:80b]nyid las/ bdag gi yongs 'dzin dam pa sangs rgyas rgyal mtshan zhes bya ba dus gsum sgrib med du gzigs pa'i skyes chen dam pa de nyid kyis gsang ba 'dus pa'i chos skor rdzogs par gsan pa yin no/ /de rnams kyis mar lugs kyi bla ma brgyud pa'i rnam thar bstan pa'i sgo nas mar lugs ji ltar dar ba'i tshul bstan zin pa yin la/ gsum pa sa lugs kyi bla ma brgyud pa'i rnam thar bstan pa'i sgo nas sa lugs ji ltar dar ba'i tshul la yang / sa lugs rnying ma'i brgyud pa'i rim pa dang / gsar ma'i brgyud pa'i rim pa bstan pa'i sgo nas lugs 'di ji ltar dar ba'i tshul gnyis las/ dang po ni rje 'gos lo chen pos mkhon dkon mchog rgyal po la gnang / des skyu ra a skyabs la/ des sa chen la gnang zhing / yang 'gos kyi slob ma rgyud kyi ka ba tshugs pa bzhi'i nang tshan dbus pa dge ser gyis gnam kha'u pa chos kyi rgyal mtshan la 'dus pa'i dbang rgyud gdams pa mtha' dag gnang ste/ kha'u pa la 'dus pa'i sgrub thabs bstan pa'i nor rdzas bya ba sogs dang / gzhan yang man ngag mang du bzhugs/ de nyid kyi drung du rje btsun sa skya pa chen po kun dga' snying pos spyir mdo sngags kyi chos tshul bsam gyis mi khyab pa zhig gsan zhing / dang po bla chen 'di kha ba can gyi 'gro ba yongs kyi bsod nams kyi mgron du 'byon pa'i rten 'brel yang bla ma 'di nyid kyis sgrig par mdzad/ bla chen 'di la sras kyi thu bo bzhi dang / dpal chen 'od po la sras gnyis byon pa'i chung ba zangs tsha bsod nams rgyal mtshan la sras che ba chos rgyal 'phags pa dang / 'gro mgon