[A:92a]gyi dbang gi gsol btab sbyar nas 'khor lo la sogs pa phyag mtshan bzhi'i dbang bskur/ de nas slob ma dbang stegs kyi steng du 'khod la nang dbang bskur/ slar phyir 'thon pa la ye shes pa bcug gnas gsum byin gyis brlabs la dam tshig gsum byin pa rnams mdzad cing / lugs snga mar de dag mi mdzad la/ yang dbang bka' rnying ma'i lugs la slob dpon gyi dbang dang / slob ma'i rig pa'i dbang rnams la nang dbang ma bshad gsar mar de kun la nang dbang bshad la/ gzhan yang snga mar dbang de rnams so sor lus dkyil 'god par ma bshad cing / phyi mar nang dbang bskur ba'i rjes la slob ma dbang stegs kyi steng du 'khod nas rten dang brten pa'i lus dkyil la bkod/ ye shes pa bcug gnas gsum byin gyis brlabs nas dbang bskur bar mdzad pa yin la/ dbang gong ma gsum ni gsar mar zung 'jug gsal ba nas kha bskangs pa bzhin mdzad la/ de dang snga ma'i lugs kyi dbang gong ma gsum bskur ba'i tshig rigs mi 'dra ba mang du yod la/ gzhan yang lugs snga mar bum dbang thob nas dben pa gsum kar bsgom pa dang / gsang dbang thob nas sgyu lus dang / sher dbang thob nas 'od gsal dang / dbang bzhi pa thob nas zung 'jug bsgom par rtogs bskyed la gsungs/ phyi mar dbang gi rtogs bskyed la bum dbang thob nas bskyed rim yan lag dang bcas pa bsgom du rung / gsang dbang thob nas rdo rje'i bzlas pa dang sems dben bsgom pa la dbang / shes rab dbang thob nas bdag byin gyis