[A:9b]zhabs lugs pa med mi rung du 'dod pa'i bshad rgyud gnyis dang / rnam snang sgyu 'phrul dra ba dang / gnyis med rnam rgyal dang brgyad la bzhed/ yang 'ga' zhig gong ma bzhi po de'i steng du lha'i dbang pos zhus pa dang / rgyud phyi ma gnyis bsnan nas bshad rgyud drug tu 'dod la/ de la chos rje ri bo dge ldan pas/ lha'i dbang pos zhus pa gsang ba 'dus pa'i bshad rgyud du 'phags lugs pa bzhed pa'i shes byed la/ sgron gsal du e waM ma ya'i bshad pa'i skabs su lung du drangs shing tshad mar mdzad pa'i phyir zhes pa dang / rgyud phyi ma bshad rgyud yin pa'i shes byed du sgron gsal du lung 'dren yang yang mdzad cing don yang dag par bshad pa'i phyir zhes bkod pa sogs mkhas pa'i bzhed pa mi mthun pa mang na yang / gsang ba 'dus pa'i bshad rgyud la dgur 'dod pa ni mi 'thad par bshad pa yin te/ gnyis med rnam rgyal dang / lha'i dbang pos zhus pa dang / rnam snang sgyu 'phrul dra ba dang gsum po 'di gsang ba 'dus pa'i rgyud ma yin pa'i phyir/ dang po gnyis med rnam rgyal gsang 'dus kyi rgyud du mi 'thad de/ gnyis med rnam rgyal la che chung gnyis yod pa'i che ba ni/ rgya pho ba lung pas mdzad pas rgyud rnam dag min par bshad cing / chung ba ni rnam snang sgyu 'phrul dra ba'i rgyud dang mthun pas sgyu dra'i chos skor ston byed yin gyis/ gsang 'dus kyi chos skor ston byed ma yin par bshad pa'i phyir/ gnyis med rnam rgyal rgya pho ba lung pas brtsams tshul yang / khong la 'dus pa mar lugs kyi man ngag mang du yod pas/ de rnams ston byed kyi rgyud gcig dgos pa 'dug