[A:16a]phyag tu byung nas dpyad pa mdzad pa'i dkyil chog nyi shu pa'i dpe de thog mar dpal 'phags pa klu sgrub kyis dkyil chog bsdus se ba zhig mdzad pa la/ 'ga' zhig gis gsal byed kyi mchan btab pa phyis su dkyus su shor ba lta bu'i lhad cung zad zhugs pa zhig yin nam snyam mo/ /yang 'ga' zhig las 'gyur nyes pa yin nam yang gsungs/ de yang cung zad mi 'grig ste/ phyis su 'gyur byed gzhan zhig gis bsgyur nas kha 'phangs byas pa lta bu yin pa'i sgros ni rang gzhan kun la mi snang la/ de min phyin dang po'i 'gyur de la 'gyur skyon yod med 'gos lo sogs mkhas pa snga ma de dag gis mi mkhyen pa mi srid pa'i phyir ro/ /'di dag ni mkhas pa'i bzhed pa de dag la bsam byung gi blo gros kyis zhib tu brtags nas rang gi blo la shar tshul brjod pa'i sgo nas 'thad mi 'thad kyi rnam dbye phye ba tsam yin gyis/ mkhas pa snga ma rnams la sun 'byin bgyid 'dod sogs kyi bsam pa ni kho bo la med pas da dung rnam dpyod dang ldan pa dag gis mkhas pa rnams kyi bzhed pa de dag so so dang / kho bos bshad pa 'di dag la yang brtag dpyad legs par gyis la gzu bor gnas pas smra bar byos shig dang / lung rigs dang mthun pa snang tshe kho bos kyang 'jug bzlog bgyid cing / gzhan dag gis kyang de bzhin bya rigs te/ bdag nyid chen po sa paN gyis/ gal te bdag gi tshig bden na/ /dam pa rnams kyis legs zhes gsungs/ /'on te 'di la skyon chags na/ /lung dang rigs pas sun phyungs shig /ces