[A:24b]gsum byon te/ paNDi ta btsun mo can/ mngon shes can/ nag po dam tshig rdo rje/ paNDi ta sprin gyi shugs can dang bzhi la gsang ba 'dus pa'i chos skor mthil phyin par gsan nas bod du dar rgyas su mdzad pa la gsang 'dus 'gos lugs zhes grags shing / lo tsA ba 'dis dpal gsang ba 'dus pa la 'chad nyan rtsal ston mdzad pas slob ma yang rgyud kyi ka ba btsugs pa bzhi/ man ngag gi gdung ma theg pa brgyad/ las tshogs dang 'phrin las la mkhas pa lcam dang dral ma gshibs pa lta bu shin tu mang ba byung ba'i tshul sogs rgyas pa 'og tu 'byung ngo / /'dis sgron gsal la 'gyur bcos cung zad mdzad/ de la sgron gsal g.yar khral mar grags/ gsang 'dus rtsa rgyud lo chen rin bzang gis bsgyur ba la bcos ma mdzad/ rgyud don mtha' dag mngon rtogs kyi rim par bsdebs nas brjod bya rgya che bar ston zhing / bla ma dang po gsum gyi dgongs bzhed thams cad bkod pa'i stong thun chen mo/ /'chad thabs rgyan bdun sogs kyi rnam gzhag ston pa stong thun chung ba/ rtsa rgyud kyi tshig 'grel sgron gsal gzhir bzhag pa la bla ma rnams gyi bshad srol thun mong ba dang / nang gses mi 'dra ba so sor ma 'dres par rtsa rgyud kyi steng du mchan bkod pa la rgyud kyi mchan chen du grags pa rnams mdzad/ gzhan bla ma rnam gsum gyi gdams pa yi ger bkod pa la 'gos kyi shog ril gsum du grags pa sogs gsang ba 'dus pa skor la bstan bcos yang mang du mdzad