[A:26b]babs gzhan rnams kyi dbang yang don gyis thob par 'gyur bas so/ /'on kyang tshig gi brgyud pa la dbang chog gcig la brgyud pa thams cad 'dren pa ni phyag len zor yangs su shor bar snang ste/ don 'di la dgongs nas bdag gi bla ma mkhan chen thams cad mkhyen pas mdzad pa'i gsang 'dus mi bskyod pa'i dbang bka' gsar rnying gi dogs dpyod blo gsal nyer mkho'i legs bshad ya rab mkhas pa'i gtam skyes zhes bya ba las/ sngar gyi ngor chen rdo rje 'chang gi gsung rgyun de 'dren par mdzad nas zhes rdo rje 'chang kun dga' bzang pos gsungs par bshad pa 'di myangs na/ 'di'i khog na sbas don zab mo zhig 'dug ste gsal grags na chu la nya mi chags/ da dung yang dpyod ldan dag gis gab par bya'o zhes gsungs pa yang blo gros dang ldan pa rnams kyi yid la 'bab pa'i gsung yin no/ /yang skyes mchog mar pa lo tsA bas rgya gar du byon nas jo bo nA ro ta pa la 'dus pa'i dbang dang / rim lnga'i khrid/ rgyud rkyang man ngag gi bshad pa hril gyis dril ba tsam gsan/ rgyas par ni nub gu la kShe tra'i gtsug lag khang na bzhugs pa'i dpal ye shes snying po las 'dus pa'i dbang rgyud gdams pa 'grel pa dang bcas pa'i bka' mtha' dag gsan bod du spel ba las mar lugs zhes yongs su grags/ de yang lugs 'di la mkhas pa paNDi ta'i lugs dang / ku sa li'i lugs gnyis mdzad nas/ dang po sgron gsal dang / spyod bsdus kyi steng nas rim gyis lam ston pa 'grel pa lugs dang / gnyis pa ni rnal 'byor pa ku sa li'i nyams len sangs rgyas lag