[A:28a]yin no/ /gzhan yang bod du gsang ba 'dus pa dpyal lugs dang / gnyos lo tsA ba'i lugs kyi gsang 'dus 'jam rdor gyi bshad srol/ pa tshab lo tsA bas shud phu lo tsA ba'i lugs kyi gsang 'dus bsgyur ba sogs shin tu mang ba byon kyang / de dag phal cher ni dbang dang rgyud bshad gdams ngag sogs phyogs re ba tsam yin la/ smin grol cha tshang zhing lugs srol kun gyi gtso bo ni 'gos lugs dang mar lugs gnyis dang / phyis su bdag nyid chen po sa paN la bka' babs pa'i lugs gsar ma dang gsum yin la/ de dag kyang gsang ba 'dus pa mi bskyod pa'i rigs yin gyi/ 'jam pa'i rdo rje dang jo bo'i lugs kyi gsang 'dus spyan ras gzigs kyi srol gnyis po 'di yang mkhas pa rnams la rtsod med tshad thub du grags shing deng sang bka' ma nub par bzhugs so/ /de rnams kyis dpal gsang ba 'dus pa rgya bod du lam srol ji ltar byung ba'i tshul bstan zin nas// ! //spyi don gsum pa 'dus pa'i bla ma brgyud pa'i rnam thar bstan pa'i sgo nas rgya bod du ji ltar dar ba'i tshul la yang / 'phags yul du byon pa'i bla ma brgyud pa'i rnam thar bstan pa'i sgo nas 'phags yul du ji ltar dar ba'i tshul dang / bod yul du byon pa'i bla ma brgyud pa'i rnam thar bstan pa'i sgo nas bod yul du ji ltar dar ba'i tshul gnyis las/ dang po la 'phags lugs kyi bla ma brgyud pa'i rnam thar bstan pa'i sgo nas 'phags skor dar ba'i tshul dang / ye shes zhabs lugs kyi brgyud rim bstan pa'i