[A:29a] rmi lam du mkha' 'gro mas khyod de lta bu'i theg pa'i mchog 'dod na/ 'di nas byang phyogs na dpal u rgyan gyi gnas zhes bya bar he ru ka rang byung gi lha khang na dpal gsang ba 'dus pa la sogs pa'i rgyud sde rin po che rnams ye shes kyi mkha' 'gro ma rnams kyis bdag byas nas yod pas der song la zhus shig ces lung bstan no/ /der rgyal pos dpal u rgyan gyi gnas su byon te he ru ka rang byung gi lha khang gi sgo bzhi nas rim pa bzhin phyag byas/ slar yang shar sgo nas phyag byas gsol ba btab pa'i rjes su bud med gcig byung nas/ khyod rgyal po bi su kalpa yin nam gsungs/ yin byas pas/ lha khang gi nang du khrid gsang ba 'dus pa'i dkyil 'khor du mngon sum du bcug dbang bskur/ rgyud bshad/ gdams pa dang rjes su gdams pa mtha' dag gnang nas glegs bam gtad do/ /spyir o rgyan du la las dbang dang lung thob kyang rgyud ma lon pa dang / la las rgyud lon kyang dbang dang lung ma thob pa yod na'ang / rgyal po 'dis thams cad dus gcig la lon pa yin la/ de nas rgyal po des gsang ba 'dus pa'i don bsgoms pas phyag rgya chen po mchog gi dngos grub brnyes nas rgyud rnams khyer te 'phags yul du byon pas/ de'i tshe 'phags yul gyi yul ra Da'i bram ze zhig la sras bzhi yod pa las/ de dag gis gzhon nu'i dus su sgra'i bstan bcos la sogs pa rig pa'i gnas la legs par sbyangs/ phyis bstan pa la dad par gyur pa dang / de'i nang nas gcig bcom ldan 'das kyi sras sgra gcan 'dzin bzang po'i drung