[A:47b]'grel pa skal ldan grags pas mdzad pa de las dngos slob tu bshad mod kyang / 'grel pa de ni tshad mar bu ston sogs kyi mkhas pa mang pos mi bzhed pa ltar don la yang gnas pas 'gal ba med do/ /gal te de rgya 'grel yongs grags yin pas tshad mar rigs so snyam na/ de la yang nges pa med de/ rgya gar gyi paNDi ta yin kyang 'khrul pa mnga' ba mang du yod de/ slob dpon dbang phyug sde phyogs glang gi dngos kyi slob ma yongs grags kyi mkhas pa chen po yin kyang / phyogs glang gis mdzad pa'i tshad ma mdo'i don nor bar bshad pa/ dpal ldan chos grags kyis lung 'gal gyi sgo nas bkag cing / klu sgrub kyi rim lnga'i rim pa gnyis pa'i mjug tu shAkya bshes gnyen gyi mdzad byang byung ba la 'khrul nas rgya gar ba 'ga' zhig gi shAkya bshes gnyen klu sgrub kyi mtshan gyi rnam grangs su bshad pa sogs rgya 'grel rnams la yang nor ba mang du yod pa'i phyir ro/ /do ha mdzod kyi Tikka rnams las kyang dngos slob yin par bshad kyang / de yang lo rgyus tshad ma yin pa'i nges pa med cing / yin na yang des mi gnod cing / do ha mdzod kyi Tikkar ma zad dbu ma'i brgyud rim 'ga' zhig las kyang / klu sgrub nas zla grags la brgyud tshul la nye gnas dngos grub brnyes pa'i rnal 'byor ba las brgyud tshul/ gzhung bshad rgyud kyi mkhas pa paNDi ta las brgyud tshul/ rtsa ba klu sgrub nyid la dngos su thug tshul dang gsum du byas nas/ phyi ma la zla grags kyis klu sgrub la dngos su thug tshul yang bshad mod cing / gzhan yang brgyud yig 'ga' zhig las/