[A:92a]des na nag dril gnyis kyi brgyud pa ltar na rnam rgyal nas te lo pa la brgyud pa yin pas/ rnam rgyal dang bar ma'i slob dpon gnyis kas dbang bskur cing rgyud byin gyis brlabs pa ni/ slob dpon chen po te lo pa ste/ dang por rgyal rigs las rab tu byung / mtshan shes rab bzang po zhes gsol/ yongs su rdzogs pa'i paNDi tar gyur nas slob dpon rnam rgyal zhabs la 'khor lo sdom pa'i dbang dang gdams ngag zhus/ bla mas khyod shar phyogs su song la za hor gyi grong khyer rgyal po utma skyes kyis byin gyis brlabs pa'i gnas kyi tshong 'dus na smad 'tshong ma til rdung ba zhig yod pa de'i g.yog gyis la rtogs pa sbyongs shig ces lung bstan pa bzhin byon nas g.yog mdzad pas mos til brdung du bcug pa na/ de brdungs shing nyams su blangs pas til la mar gnas kyang / brdung ba dang btsir ba ma byas na mngon du mi 'gyur/ de bzhin du rang sems sangs rgyas su gnas kyang nyams su ma blangs na mngon du mi 'gyur dgongs nyams su blangs pas de kho na nyid kyi rtogs pa rgyud la 'khrungs te/ rdo rje 'chang gis dngos su byin gyis brlabs nas phyag chen mchog gi dngos grub brnyes/ der smad 'tshong mas mtshan mo nam mkhar me dpung 'bar ba'i dbus su 'dug pa mthong nas bshags pa byas gsol ba btab pas/ dbang bskur gdams pa bstan nas mos kyang dngos grub thob/ de rgyal pos thos pas drung du mjal/ til mar gyi dpes