[A:91b]ma bar ma'i slob dpon/ de nas ti lo pa la brgyud pa yin te/ rje btsun rin po ches/ lU hi pa dang / dha ri ka andhar pa dang te lo pa/ zhes gsungs pas so/ /nag po pa dang / dril bu pa'i brgyud pa la ni bar ma'i slob dpon mi dgos la/ rje btsun rtse mos grub chen dril bu pa'i gong du slob dpon 'di 'dren par mdzad pa dang / brgyud 'debs gang drin mar chos rje sa paN gyis rnam rgyal dang bar ma gnyis la bstod pa rim bzhin mdzad pa ni/ bar ma'i slob dpon dha ri ka pa'i dngos slob dang / ti lo pa'i bla ma yin pa dang / lU hi pa'i brgyud pa 'dus pa la dgongs pa yin par bshad la/ bu ston rin po che'i bde mchog chos 'byung las/ gu hya pa'i slob ma bhu ba pa/ de gnyis kyi slob ma rnam rgyal yin par bshad pa'i rjes su/ de yang dril bu pa dang nag po pa'i brgyud pa gcig tu sdom pa'i phyir dril bu pa man chad bcug cing / lU hi pa'i dbang du byas nas/ dha ri ka pa'i slob ma andhar pa yin la/ andhar pa dang rnam rgyal zhabs gcig pas de la bar gyi rnams med pas chog ces sa skya'i yig cha rnying ma las 'byung ngo / /zhes gsungs 'dug kyang / bu ston rang gis yi ge ma dag pa zhig gzigs sam snyam ste/ rje btsun sa skya pa'i lugs la lU hi pa'i brgyud pa la/ rdo rje dril bu pa nas rnam rgyal gyi bar sogs mi dgos par/ dha ri ka pa nas/ bar ma'i slob dpon la ded pas chog kyang / de dang andhar pa gcig gis/rnam rgyal dang andhar pa gcig par mi bzhed pa'i phyir ro/ /