[A:93b]gos med pa zhig lag na nya gson po 'ga' khyer me la 'jug cing sreg pa mthong nas/ 'di ltar ma byed byas pas/ nya bsregs pa chur bcug ste phus btab pas nya rnams ma shi bar song ngo / /der na ro pa'i dgongs pa la 'di nus pa dang ldan pa zhig 'dug pas ti lo pa yin las che snyam pa dang / ti lo pa yin no zer/ yang res phyi 'gros byed pa sogs smyon pa 'dra bar mthong bas/ ti lo pa min nam snyam pa na/ min min gsungs pas mngon shes mnga' bar shes te phyi bzhin 'brangs pas/ mi zhig gis rnal 'byor pa de la ras kyi stod g.yogs gcig thur mas gzer te phul bas/ thur ma de bton nas na ro pa'i gsang gnas su bcug nas gar song cha med du gyur to/ /der gsang gnas skrangs te 'gro mi shes par yod pa la/ ti lo pa byon te mi na'am gsungs pa la sdug bsngal lo zhus pas/ thur ma bton phyag gis reg nas/ ro ga na hi/ pho ga na hi/ na ba med tsha ba med ces gsungs pas de las grol lo/ /yang phyi bzhin 'brangs pas/ rgyal po'i btsun mo skyed mos tshal du 'gro ba gzigs te/ skyes bu snying stobs dang ldan pas btsun mo'i nu ma mnyed nus sam zer/ nus zhus na ro pas bram ze'i cha byad byas me tog gi phreng ba zhig bzung sgor bsdad pas/ tshur log pa na de'i drung du rig byed ston pas bkra shis so zer me tog gi phreng ba btsun mo la bcings nas nu ma mnyes pas 'khor rnams kyis dbyug gu bsnun te brdungs pas cher snyung ba na/ slob dpon