[A:131b]kyang mtha' yas pa zhig stsol ba la thogs pa med pas lung gi yon tan gyi mdzod mnga'/ rje nyid ya ma'i gdan sar bzhugs dus/ rje sems dpa' chen pos kyang da lta ya ma phu na bla mas 'chad shes/ slob mas nyan shes pa'i 'chad nyan rnam dag de yod pa yin zhes bstod bkur gyi bsngags pa'i sgra dbyangs sgrog par mdzad/ mdor na dgung lo dgu pa la rab tu byung ba nas/ re bzhi pa'i bar du bstan pa rin po che'i bya ba kho na mdzad de/ sa phag hor zla bcu gnyis pa'i gnam stong gi nyin dpal ngam ring gi rgyal khab chen por ngo mtshar rmad du byung ba'i rnam 'phrul mang po dang bcas te sku thim pa'i tshul bstan/ de nas cho 'phrul zla ba'i tshes brgyad kyi bar zhal dkyil gzi mdangs dang ldan zhing 'od zer 'phro ba dang / ngam ring rtse shod thams cad drod kyis khyab ste yon chab dang zhal zas sogs kyang mi 'khyag pa dang / de nas tshes brgyad kyi tho rangs thugs dam de las grol te/ rje sems dpa' chen po bzhugs pa'i drung bde ba can du gshegs so/ /de nas sngar bzhin yon chab sogs kyang 'khyag pa zhig byung bas kun gyis ngo mtshar du 'dzin pa byung zhes thos so/ /de la slob ma'i mchog mang yang / dpal 'khor lo sdom pa'i bka' 'dzin pa ni mnga' ris pa dpal ldan rgyal po ste/ 'di ni chu mo glang gi lo mnga' ris stod kyi phyogs su 'khrungs/ dgung lo dgu pa'i tshe bla ma bsam gtan dpal ba las rab tu byung / slob