[A:49b]yongs su mya ngan las 'das pa nyid las brtsams nas theg pa chen po la yang dag par zhugs pa rnams la stong pa nyid smos pa'i rnam pas ches ngo mtshar rmad du byung ba'i chos kyi 'khor lo gnyis pa bskor te/ bcom ldan 'das kyis chos kyi 'khor lo bskor ba de yang / bla na mchis pa/ skabs mchis pa/ drang ba'i don rtsod pa'i gzhi'i gnas su gyur pa lags la/ zhes gsungs/ 'di ni dbu ma pa rnams dgongs pa can du 'chad do/ /de'i rjes su slar yang bcom ldan 'das kyis/ gnas ri ma la ya dang / yangs pa can la sogs par/ 'khor theg pa thams cad la yang dag par zhugs pa'i gang zag rnams la/ chos bka' tha ma legs par rnam par phye ba'i chos kyi 'khor lo/ dgos pa 'khor lo dang pos med par lta ba ldog nas yod rtog shas che bar gyur pa na kun btags med cing / gzhan dbang kun rdzob tu yod pa dang / yongs grub gnyis don dam du yod par bstan pas mtha' gnyis su 'dzin pa ldog pa'i ched du gsungs pa yin te/ mdo sde dgongs pa nges 'grel las/ bcom ldan 'das kyis chos rnams kyi ngo bo nyid ma mchis pa las brtsams te/ skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas theg pa thams cad la yang dag par zhugs pa rnams la legs par rnam par phye ba dang ldan pa/ ngo mtshar rmad du byung ba'i chos kyi 'khor lo gsum pa bskor to/ /bcom ldan 'das kyis chos kyi 'khor lo bskor ba 'di ni bla na ma mchis pa/ skabs ma mchis pa/ nges pa'i don lags te/ rtsod pa'i gzhi'i gnas su gyur pa ma lags so zhes gsungs pas so/ /de ltar mdo sde dgongs pa nges 'grel las/ chos 'khor dang po gnyis drang don dang / tha ma nges don yin par bshad pa 'di ni/ rnam rig rtsal du pa ston sems tsam pa'i grub mtha' la dgongs pa yin gyi/ dbu ma pa dag gi lugs dang mi mthun pas theg chen thun mong ma yin pa'i lugs la mdo de sgra ji bzhin pa'i don ni 'thad ldan du mi bzhed do/ /chos 'khor rim can du gsungs tshul de yang / rin chen phreng ba las/ brda sprod pa dag ji lta bur/ /yi ge'i phyi mo klog 'jug ltar/ /de bzhin sangs rgyas sems can la/ /ji tsam bzod pa'i chos bstan to/ /zhes gsungs pa ltar gdul bya rim gyis drang dgos pa rnams kyi don du gsungs pa'i lugs yin la/ don dam par na bcom ldan 'das kyi gsung gcig nyid kyis/ dus gcig nyid la gdul bya tha dad pa du ma la chos tha dad pa du ma gsungs pa'i snang ba cig char du bstan pa yin te/ dgongs pa lung ston las/ rtog pa med cing 'khrug med pa/ /yid 'ongs rdo rje'i tshig gcig pu/ /gdul bya'i bsam pa'i dbang gi na/ /bye brag mang por 'gyur ba yin/ /zhes pa dang / gzhan yang / gsung