[A:50a]gcig nyid du gsungs mod kyi/ /du ma nyid du so sor go /zhes gsungs pas so/ /des na gdul bya rnams la dus gcig nyid du bcom ldan 'das kyi gsung gcig nyid kyis chos tha dad pa du ma gsungs pa ni gsung gi bkod pa zhes bya ba yin la/ dus gcig la gnas tha dad par sku tha dad pa du ma ston pa ni sku'i bkod pa zhes bya ba yin no/ /gnyis pa thun mong ma yin pa rdo rje theg pa'i chos 'khor bskor tshul la/ spyir gsang sngags gsungs tshul/ khyad par du 'khor lo bde mchog gsungs pa'i tshul dang gnyis las/ dang po ni/ spyir gsang ba 'dus pa'i rgyud las/ gsang sngags rdo rje'i theg pa 'di da ltar gyi sangs rgyas shAkya thub pa kho nas gsungs kyi/ 'das pa'i sangs rgyas rnams kyis kyang ma gsungs/ ma 'ongs pa'i sangs rgyas rnams kyis kyang gsung bar mi 'gyur zhes gsungs mod kyang / de ni gsang ba 'dus pa sogs kyi che ba brjod pa tsam yin gyi nges don du dus gsum gyi sangs rgyas thams cad kyis gsang sngags rdo rje'i theg pa legs par gsungs pa yin te/ sgyu 'phrul dra ba las/ 'das pa'i sangs rgyas rnams kyis gsungs/ /ma 'ongs rnams kyang gsung 'gyur la/ /da ltar byung ba'i rdzogs sangs rgyas/ /yang dang yang du gsungs pa gang / /zhes sogs gsungs shing / de ltar du slob dpon rtse mo'i rgyud sde spyi rnam las gsungs pa'i don bsdus nas/ mkhas pa'i dbang po dkon mchog lhun grub kyi tshul gsum gsal rgyan las/ gal te thub pa'i sngon du sngags kyi lam/ /yod na 'dus pa'i rgyud dang 'gal