[A:20a]bco lnga'i mang cha'i steng khri khar phebs nas/ bsngo rgyu'i dge rtsa'i skabs su rang cag dpon slob rnams kyis dus gsum du bsags pa'i dge rtsa 'dis mtshon nas gsungs te/ bstan pa yun ring du gnas pa dang / mtha' yas pa'i sems can gyi don du sngar nas ma byung ba lta bu'i bsngo ba smon lam shin tu rgyas par mdzad do/ /dgu pa gzugs sku chos dbyings su thim pa'i tshul ni/ snga sor dgung lo lnga cu tsam bzhes pa'i tshe ngor dbang khang du khros gtam gcig la/ nga ni drug cu re gcig pa la 'gro gsungs pa'i bka' lung gsal po gnang ba nang so don grub rdo rje la brgyud nas thos pa dang / 'brug lo bla ma rin po che lung rigs rgya mtsho'i gsung chos kyi gsol ba btab dus/ 'byon pa phyis nas thugs dgongs rdzogs pa bzhin ni yong ba dka' gsungs pa dang / sbrul lo zla ba dang po'i tshes bcu drug la snang gsum grol nas sang nyin sems bskyed chen mo yong rgyu'i do nub rje nyid la de thob kyi dngos slob ldog chos 'khor sgang gi bla ma chos rje byams pa blo gros rgyal mtshan pa'i rmi lam du/ e waM chos ldan gyi srang khrod kyi sbag sbug thams cad na bud med la lhus blangs pa'i skye bo'i tshogs grangs med pa lcags kyu dang bcas pa'i mda' dar sna lnga/ sil snyan chung chung / gsang ba'i rnga chung / pheg brdab pa dang bcas pa'i rol mo'i tshogs mang du thogs te/ gab pa'i tshul du 'dug pa la