[A:6a]nas yang rgyal ba'i bstan pa la zhugs la yongs su rdzogs pa ni dge slong nyid yin par dgongs nas/ dgung lo nyi shur phebs pa shing pho byi ba'i lo mkhan po sngar gyi dge tshul mdzad pa po de nyid dang / las kyi slob dpon 'jam pa'i dbyangs sangs rgyas rin chen dpal bzang po dang / gsang ston ra dpon yon tan 'byung gnas kyis mdzad de/ dge 'dun bcu phrag phyed kyi dbus su bsnyen par rdzogs par mdzad nas/ 'phags pa rta thul ltar spyod lam shin tu dul ba dang / ka ta ya na'i bu ltar bslab bya rnams la shin tu gus shing / 'od srung bzhin du sbyangs pa'i yon tan thams cad dang ldan pa ste/ mdor na 'dul ba 'dzin pa rnams kyi gtsug gi rgyan du gyur pa zhig ste/ ji skad du/ zhi dang nyer zhi'i myos bum mtho ldan zhing / /kun nas dul ba'i gser gyi dra ba can/ /thub bstan skyed tshal mdzad pa'i gnyis 'thung khyod/ /yongs rdzogs bstan pa'i khur chen 'degs par bzod/ /spyod lam kun nas dul ba rta thul te/ /bslab byar gus pa ka ta ya na'i bu/ /sbyangs pa'i yon tan ldan pa 'od srung bzhin/ /dri zhim lta na sdug pa 'od chags 'bar/ /zhes gsungs pa ltar ro/ /de ltar nges legs kyi lam la gcig tu gzhol zhing / lhag pa'i tshul khrims kyi thugs rgyud phyug par mdzad nas/ slar yang rang gzhan rnams grol ba thob pa'i thabs kyi gtso bo dam pa'i chos thos nas nyams su len pa dang / de'i yang rtsa ba dri ma med pa'i gsung rab la thos pa bya ba nyid yin par