[A:55]tshad med pa babs/ 'jigs shing skrag te sdug bsngal lan re grogs mched gong ma bla ma mkhan po slob dpon la sogs dang / yi dam gyi sku rgyab bstan pa spyan phyungs zhal bral/ shangs la sogs pa bcad pa khrag zhal le ba gtsug tor sa la gtsug pa la sogs lus nyams sems nyams rmi nyams su sna tshogs pa rgyun mi chad par nyams su myong bas thugs shin tu mug gsang sngags rdo rje theg pa'i las 'phro med par thag bcad de/ dpyid zla ra ba'i sa ga'i nyi shu gnyis kyi nub mo phreng ba chab khang du gtor nas/ da ni 'chad rtsod rtsom pa bsam rno la 'bad par bya'o/ /zhes dam bcas nas/ thang chad pa snyam byed de/ de'i nub mo bag skyang nas gzim pas/ bud med sngon mo mtshan dpe 'bar ba gos rgyan phun sum tshogs pa dad ldan pa gcig na re/ rigs kyi bu khyod de lta bu'i tshul min gyi spyod pa ma byed par phreng ba longs/ sgrub pa 'phro ma gcod/ yi dam gyi lha thams cad ngo bo gcig kyang / gdul bya'i snang ngor khyod kyi rigs kyi lha nga yin pas/ ngas rgyud byin gyis brlab kyis gsung / 'gyod pa drag po skyes te/ bshags sdom drag po byas/ nang par phreng ba blang / gsang 'khrus byas te sngar bzhin bsnyen sgrub byas pas/ de'i nub mo ye shes kyi snang ngor lha mo bco lnga'i dkyil 'khor du byon nas/ gtso mos dbang bzhi rdzogs par bskur bas/ rim pa bzhin gsal nyams stong nyams bde nyams zung 'jug rnams ngo sprad/ gegs bsal bogs 'don la bzlas te/ nyams snang rnams bla ma nyams myong dang ldan pas rjes