[A:135]ji 'drar 'gyur snyam bsam/ /tshe 'dir rang gis dge sdig gang bsags pa/ /las de'i dbang gis phyi ma rigs drug lus/ /dbang med blangs nas bde sdug myong 'gyur bas/ /sdig la 'dzems shing dge la 'bad par rigs/ /skye dang rga dang na dang 'chi ba yi/ /chu chen bzhi 'bab las nyon chu srin brgyas/ /gzir ba'i brgal dka' 'khor ba'i mtsho chen las/ /thar thabs chos las med pas de la 'bad/ /bde ba'i skabs bral srid pa'i btson ra 'dir/ /bzod med sdug bsngal gyis gzir sems can rnams/ /tshe sngon phan btags pha mar shes byas nas/ /rgyun chad med par byams dang snying rje bsgom/ /dmigs med snying rje'i dbang gis 'gro ba kun/ /srid dang zhi ba'i 'jigs las bskyab pa'i phyir/ /myur du sangs rgyas thob 'dod smon pa'i sems/ /kha tsam min pa snying nas yang yang bskyed/ /rgyun chad med par 'khor bar 'khyams pa'i rgyud/ /rang nyid gces 'dzin 'gong po 'di kho na/ /ma gtogs sdug bsngal lan rtsa gzhan med pas/ /bdag 'dzin dgra bo 'dul la 'bad par gces/ /bcos min snying rje chen pos mtshams sbyar nas/ /mkha' khyab 'gro rnams bdag gi mdun dmigs te/ /de dag sdig sdug bdag la len pa dang / /rang gi bde dge 'gro la gtang bar bya/ /de ltar sangs rgyas bstan pa'i snying po yi/ /nyams len rgyun de rtag tu dran bya zhing / /rang don g.yo sgyu spangs pa'i bsam sbyor gyis/ /dngos brgyud sgo nas gzhan don ci nus bsgrub/ /kun rdzob byang sems nyams len de lta