[A:༦༢༣]མེད་པ་ཚོགས་པ་རྣམས་ལ་དབང༌། རྒྱུད། མན་ངག །ལུང་ལ་སོགས་པའི་སྒོ་ནས་རང་རང་གི་སྐལ་བ་དང་འཚམ་པར་སྨིན་གྲོལ་ལ་བཀོད་པར་མཛད་དེ། གླང་ལོའི་དཔྱིད་ཞིང་འདིའི་གཞན་དོན་རྫོགས་པས་ཐུགས་རངས་ཏེ། ཞིང་གཞན་དུ་གཤེགས་པར་བཞེད་ནས། གསུང་ངག་རྫོགས་པའི་རྗེས་སུ་འདི་ལ་ལམ་འབྲས་ཀྱི་རྗེས་མ་གྱིས་གསུངས། དེའི་དབྱར་ཁ་ནས་སྐུ་མཚམས་ལ་བཞུགས་པར་བཞེད་ན་ཡང༌། ཆོས་རྗེ་གླང་ཐང་པ་ཕེབས་པས་སླར་ཡང་གསུང་ངག་ཚར་གཅིག་གནང་བར་མཛད་དོ། །གསུང་ངག་མ་རྫོགས་པའི་གོང་ཙམ་དུ་བཞི་སྡེ་མཁན་ཆེན་པས་གཙོ་མཛད་རྣམས་ལ་ནག་པོ་རིམ་བཞི་གནང་སྟེ། ཆོས་འཕྲོ་རྣམས་རྫོགས་ནས་ཟླ་བ་དགུ་པའི་ཚེས་ཉི་ཤུ་ལ་ཆོས་རྗེ་གླང་ཐང་པ་དཔོན་སློབ་རྣམས་ངོར་དུ་ཐེགས། དེ་རྗེས་བདག་ཆེན་བློ་གྲོས་དབང་ཕྱུག་པ་བཞུགས་པར་བཞེད་ནས་ཞུ་བ་ནན་གྱིས་ཕུལ་ལ། རྗེའི་ཞལ་ནས་ངེད་ད་ལོ་ལུང་ཕུག་ཡ་གི་དེ་ནར་འཆི་རུ་འགྲོ་བ་ཡིན། ང་ཤི་བའི་རྗེས་སུ་གྲྭ་བུ་སློབ་ཀྱི་འདུ་འཚོགས་དང་མཆོད་བསྔོ་ལ་སོགས་པ་འཇིག་རྟེན་གྱི་བརྡ་ཆད་མང་པོ་དང༌། དེ་དག་གི་མགོ་མ་ལ་སློབ་མའི་དྲག་ཤོས་ས་སྐྱ་འཁོན་གྱི་གདུང་བརྒྱུད་བཞུགས་ཞེས་པའི་གཏམ་འདི་ལ་ཞེ་འདོད་དང་པོ་ནས་མེད་པ་ཡིན་པས་ཅིས་ཀྱང་བྱོན་མཛོད་ཅེས་པའི་ཞལ་ད་ནན་གྱིས་གནང་བས། བདག་ཆེན་པས་ཀྱང་བླ་མའི་ཐུགས་དགོངས་དང་བསྟུན་པར་མཛད་དེ་ཉི་ཤུ་དྲུག་ལ་བཏེག་པར་མཛད་དོ། །དེ་ནས་སྨིན་དྲུག་ཟླ་བ་སྔ་མའི་ཚེས་གསུམ་གྱི་བར་ཞག་བདུན་ལ། ལ་སྟོད་ལྷོ་བྱང་སོགས་ནས་རབ་བྱུང་བསྙེན་རྫོགས་སོགས་དོན་དུ་གཉེར་བ་མང་དུ་བྱུང་བ་རྣམས་ལ་སྐུ་གཟུགས་ཀྱིས་གང་ལྕོགས་མཛད་ནས། ཚེས་གསུམ་གྱི་ཉིན་བསམ་གཏན་ཕུག་ལ་བཏེག་སྟེ་དབེན་གནས་སུ་ཕེབས་ནས། ཇ་སྦྱོར་ཅིག་གི་རིང་ལ་ཞབས་དྲུང་ན་གནས་པ་རྣམས་ལ་ཞལ་ད་མང་དུ་གནང་ནས། དང་པོ་ནས་ངེད་ཀྱི་བསམ་པ་ལ། མི་མེད་ཀྱི་ལུང་སྟོང་ཞིག་ཏུ་འཆི་ས་བྱེད་དགོས་སྙམ་པ་