[A:༦༢༤]ཡོད་པ་དེ་འགྲུབ་བྱུང༌། ད་ལྟ་ཤི་ཡང་སེམས་ལ་འཕྲེང་བ་གཅིག་ཀྱང་མེད། སྔར་བྱས་པའི་ལས་ལ་འགྱོད་པ་ཡང་མེད། འདི་བྱ་དགོས་སྙམ་པ་མ་གྲུབ་པ་ཡང་མེད། མི་ཡུལ་དུ་སྡོད་ཡུན་ཡང་རིང་པོ་ཡིན། གཞན་ལ་འདི་བྱ་འདི་གྱིས་ཀྱི་བཀོད་པ་ཡང་ཕོ་ལོ་བརྒྱད་ཅུ་གྱ་གསུམ་པ་ཞིག་གིས་མི་འོང་གསུངས་ནས་ཐུགས་སྤྲོས་པ་བཅད་པར་མཛད། ངའི་གན་དུ་དཀོན་བཟང་གཅིག་པུ་སྡོད། གཞན་སུ་ཡང་མ་སྡོད་གསུངས་པ་ལ་ཁོང་རྣམས་ཀྱིས་གུང་ཐུན་རན་འདུག་པས་ཐོག་མར་གུང་ཐུན་ཅིག་མཛད་ནས་དེ་རྗེས་གསོལ་ཇ་ཞིག་མཛད་དམ་ཞུས་པས་ཡུད་པ་ཅིག་ཁྱོམ་ཚོ་གྱིས་དེ་ནས་ཁྱེད་རང་ཐམས་ཅད་སོང༌། ད་ཉིན་མཚན་ཁོར་ཡུག་ཏུ་དགེ་སྦྱོར་དུ་འགྲོ་བ་ཅིག་བྱེད་པ་མ་གཏོགས་པ་ཐུན་གྱི་ངེས་པ་མི་འོང་གསུངས། དེ་ནས་བཟུང་སྟེ་ཟླ་བ་དེའི་ནང་དུ་ཐུགས་དམ་ལ་རྩེ་གཅིག་ཏུུ་བཞུགས། ཚེས་བརྒྱད་ཀྱི་བར་དུ་ཞབས་བསྐོར་སོགས་ཀྱང་མང་དུ་མཛད། དེ་ནས་སྐུ་ཤེད་ཅུང་ཟད་ཆུང་དུ་སོང་ནས་གླིང་ཁར་སྐུ་རིམ་ཉི་མ་གསུམ་ཙམ་བསྒྲུབས་ཏེ། སྔར་སྐུ་རིམ་ཡང་འདི་འདྲ་བསྒྲུབ་ཡོད། ད་དུང་སྐུ་རིམ་འདྲ་སྒྲུབ། ལྷ་རྗེ་ཅིག་ལ་ཡང་བསྟན་ན་དྲག་གམ་ཞུས་འདུག་པས། རིམ་གྲོ་བྱས་པ་ཁྱེད་རང་རྣམས་ལ་ཕན་པས་བྱས་པས་འོང༌། ང་ལ་ནི་དབུས་གཙང་གི་བཙུན་པ་ཐམས་ཅད་འདུས་ནས་རིམ་གྲོ་བྱས། སྨན་པ་ཐམས་ཅད་འདུས་ནས་སྨན་བྱས་ཀྱང༌། ད་ལོ་སྡོད་པ་མེད་གསུངས་ནས་མ་གནང༌། ལྟས་ཅི་འདྲ་བྱུང་ཞུས་པས་ཁར་སིང་དབྱར་ཁ་ནས་གླིང་ཁའི་རི་འདི་རྟག་ཏུ་སྨུགས་པའི་རང་བཞིན་དུ་འཆར་བ་ཅིག་བྱུང༌། དེ་ས་ཆུ་ལ་ཐིམ་པའི་རྟགས་ཡིན་གསུངས་པར་འདུག །ཟླ་བ་དེའི་མཇུག་ཏུ་ཞག་བདུན་ཙམ་ཅིག་སྐོམ་དད་ཆེ་ནས་གསོལ་ཇ་མང་དུ་བཞེས་དགོས་པ་ཅིག་བྱུང་བ་དེ་ཆུ་མེ་ལ་ཐིམ་པའི་རྟགས་ཡིན་གསུང་ཞིང༌། རྟགས་ཕྱི་མ་གཉིས་ལ་འདི་ཡིན་མི་གསུང༌། དེ་ནས་སྨིན་དྲུག་ཟླ་བ་རྟིང་མའི་ཚེས་གཉིས་ཀྱི་ནུབ་མོ། ཉི་མ་བརྒལ་ཙམ་གྱི་གོང་ནས་སྐུ་ཆོས་དང། སྐུ་ཤམསྐུ་ཐབས་ཕུད་ནས་བཞག་པས། དེའི་ནུབ་མོ་མནལ་ལམ་དུ་ནམ་མཁར་