[A:༦༢༥]སངས་རྒྱས་འཁོར་དང་བཅས་པ་བཞུགས་འདུག་པ་ཅུང་ཟད་མི་དགྱེས་པའི་རྣམ་པ་ཅན་དུ་འདུག །མདང་དགོང་ཆོས་གོས་དང་ཤམ་ཐབས་བཞག་སྔས་པས་ལན་པ་འདྲ་གསུངས། དེ་ནས་མཁན་ཆེན་ཀུན་བློ་པ་སྐུ་མདུན་དུ་སྡོད་པས་ཆོག་པའི་ཞུ་བ་ནན་གྱིས་ཕུལ་བས་གནང་ནས་ཚེས་བཞིའི་ཉིན་པར་མཇལ་བའི་ཚེ། དེའི་ཉིན་སྐུ་ཁམས་བདེ་ནས་ཞལ་ད་མང་དུ་གནང༌། ངེད་ལ་བླ་མ་དུ་མ་ཡོད་པའི་ནང་ནས་ཆོས་རྗེ་རིན་པོ་ཆེ་ཀུན་དགའ་བཟང་པོ་པ་དེ་ཤིན་ཏུ་སྐུ་དྲིན་ཆེ་བ་ཅིག་བྱུང༌། དེའི་རྒྱུ་མཚན་བོད་དུ་རྡོ་རྗེ་ཐེག་པའི་ལམ་སྲོལ་ལ་བླ་མ་གོང་མ་ནས་བརྒྱུད་པའི་ལམ་སྲོལ་འདི་དང༌། མར་པ་ནས་བརྒྱུད་པའི་རྔོག་གཞུང་གི་བཀའ་སྲོལ་དང༌། ཤངས་པ་ནས་བརྒྱུད་པའི་ནི་གུ་སོགས་ཀྱི་བཀའ་སྲོལ་དང༌། བུ་སྟོན་རིན་པོ་ཆེ་ནས་བརྒྱུད་པའི་ཡོ་གའི་བཀའ་སྲོལ་སོགས་མང་དུ་ཡོད་ཀྱང༌། དུས་ཕྱིས་ཆོས་རྗེ་རི་བོ་དགེ་ལྡན་པས། གསང་སྔགས་ཀྱི་བཀའ་སྲོལ་ལ་གྲུབ་མཐའ་གསར་པ་རྐང་བཙུགས་ནས་བཤད་ཉན་གྱིས་གཏན་ལ་ཕབས་པར་མཛད། དེ་སྔར་གྱི་བཀའ་སྲོལ་དེ་དག་གང་དང་ཡང་མི་མཐུན་པ་འདུག་ཀྱང༌། དབུས་གཙང་གི་དགེ་བའི་བཤེས་གཉེན་ཕལ་ཆེར་དེ་ལ་དད་པ་ཅིག་བྱུང༌། དེ་ལ་ཆོས་རྗེ་རིན་པོ་ཆེས་གྲུབ་མཐའ་སྔ་ཕྱིའི་གནད་གཟིགས་ནས་དགག་སྒྲུབ་མང་དུ་མཛད། བླ་མ་གོང་མའི་བཀའ་སྲོལ་གྱི་རྐང་བཙུགས་ཏེ་དེའི་རྗེས་སུ་ཞུགས་པས་ཆོག་པ་ཅིག་བྱུང་བ་ཡིན། ལམ་འདི་ངེད་རང་གི་རྩོལ་བས་བྱུང་ན་ཚེ་གཅིག་ལུས་གཅིག་ལ་མཆོག་གི་དངོས་གྲུབ་སྒྲུབ་ནུས་པའི་ལམ་དུ་འདུག །ངེད་རང་གི་སློབ་མ་རྣམས་ཀྱིས་ཀྱང་བཤད་ཉན་ལ་སོགས་པའི་རྩོལ་བས་བཀའ་སྲོལ་འདི་སྤེལ་བའི་ཐབས་ལ་འབད་དགོས་པ་འདུག །བླ་མ་གོང་མའི་གསུང་རབ་འདིའི་སྟེང་དུ་རྟོགས་པ་གཞན་དང་མི་འདྲ་བ་ཞིག་ང་ལ་ཡོད་པ་ཡིན། བསྟན་པའི་རྒྱུན་ལ་ཕན་དུ་རེ་ནས་བསྐྱེད་རིམ་གྱི་གྲུབ་མཐའི་ཤན་འབྱེད་འདི་ཡང་བརྩམས་པ་ཡིན། ངེད་རང་ཡང་ཆོས་རྗེ་རིན་པོ་ཆེའི་དུས་ཐ་མའི་བཀའ་ལུང་དང་དུ་བླངས་ནས་བཤད་ཉན་བྱས་པས་ས་སྐྱ་པའི་བསྟན་པ་ལ་ཕན་པོ་བྱུང༌། བཤད་ཉན་མ་དགོས་པར་ངེད་རང་འདོད་པ་ལྟར་གྱི་སྒྲུབ་པ་ཞིག་བྱེད་རྒྱུ་བྱུང་ན་ལུས་འདི་མ་