[A:༡༩ན]པ་ནི། གསང་བ་སྤྱི་རྒྱུད་ལས། མཁས་པས་སློབ་མ་གཅིག་གམ་གསུམ། །ཞེས་སོགས་ཀྱི་ལུང་དང་འགལ། དབང་གི་ཆུ་བོ་ལས། དཀྱིལ་འཁོར་གཅིག་ཏུ་སློབ་མ་ཉི་ཤུ་རྩ་ལྔ་ལས་ལྷག་པ་གཟུང་བར་མི་བྱ་ཞེས་སོགས། གོང་མའི་གཞུང་དང་འགལ། རྗེས་བཟུང་ལ་གྲངས་ངེས་མེད་ན། སྟ་གོན་ལ་ཡོད་པའི་ཁས་ལེན་དང་འགལ་ཏེ། སྟ་གོན་གྱི་གྲངས་ངེས་རྗེས་བཟུང་གི་གྲངས་ངེས་ལ་ལྟོས། དབང་དུས་ཀྱི་གྲངས་ངེས་སྟ་གོན་གྱི་གྲངས་ངེས་ལ་ལྟོས་པར་སྤྱི་རྒྱུད་ཉིད་ལས་གསུངས་པའི་ཕྱིར་ཞེས་ལུང་རྣམས་འདྲེན་པར་བྱེད་དོ། །ལན་ལ་གསུམ་སྟེ། སྤྱིར་རྒྱུད་ཀྱི་རྗེས་འཛིན་དང་ལམ་འབྲས་གཞུང་ཇི་ལྟ་བའི་རྗེས་འཛིན་མི་མཚུངས་པར་བསྟན། འདིར་སྤྱིར་རྒྱུད་ཀྱི་རྗེས་ཁས་མི་ལེན་ཀྱང་རྗེས་འཛིན་མེད་པའི་ཉེས་པས་མི་གོས་པར་བསྟན། སྟ་གོན་སྤྱི་རྒྱུད་ཀྱི་རྗེས་འཛིན་ལ་ལྟོས་ན་ཧ་ཅང་ཐལ་བ་རྣམས་སོ། །དང་པོ་ནི། འགའ་ཞིག་གི་དྲུང་དུ། གང་ཟག་ཁ་ཅིག་དབང་ཞུ་བར་འདོད་ཅེས་ཟེར་བ་ལ། བློས་རིམ་པ་བརྟག་དགོས་པ་ལས། སྤྱིར་ཆོས་ལ་མ་ཞུགས་ན་དང་། ཞུགས་ཀྱང་ངེས་པར་ལེགས་པའི་ཆོས་ལ་མ་བཞུགས་ན་དང་། དེར་ཞུགས་ཀྱང་ཐེག་པ་ཆེན་པོ་ལ་མ་ཞུགས་ན་དང་། དེའི་སྨོན་སེམས་ཙམ་ལ་ཞུགས་ཀྱང་། སྟོང་པ་ཉིད་ཀྱི་ལྟ་བ་ལ་ཡིད་ཆེས་སམ་དང་། དེར་ཆེས་ཀྱང་གང་དོན་དུ་གཉེར་བའི་རྡོ་རྗེའི་ཐེག་པ་དེའི་རྟེན་དུ་རུང་ངམ་ཞེས་ལེགས་པར་བརྟགས་ནས་རིམ་གྱིས་དཀྲི་བར་བྱ་ཞིང་། དེ་ལྟར་ཁྲིད་པ་མཐར་ཕྱིན་པ་དེའི་ཚེ་ན། སློབ་དཔོན་གྱི་ཐུགས་རྗེས་རྗེས་སུ་གཟུང་བར་བྱ་ཞིང་། ལྷག་པའི་ལྷའི་ང་རྒྱལ་གྱིས་བསྲུང་བར་བྱས་