[A:༡༨བ]སྡོམ་པ་ལེན་པ་དང་གསོ་བ་གཉིས་ཀ་ལ་བླ་མ་དགོས་པའི་ངེས་པ་མེད་ཅེས་ཀུན་གྱིས་འཆད་པ་དང་། བྱང་སའི་དགོངས་པས། ལེན་པ་ལ་ངེས་པར་དགོས་པ་དང་། གསོ་བ་ལ་ངེས་པ་མེད་ཅེས་ཞལ་འཆམ་པ་དང་། སྤྱིར་བིརྺ་པ་ནས་བརྒྱུད་པ་བར་མ་ཆད་པའི་སྨོན་འཇུག་གི་སྡོམ་པ་ཞིག་ཡོད་པར་མི་འདོད་ན་ནི་ཤིན་ཏུ་ཐ་ཆད་ལ། ཡོད་པར་འདོད་ན་ནི་དེ་འདྲ་རྒྱུད་ལ་ཡོད་པའི་རྡོ་རྗེ་སློབ་དཔོན་དེས། ཕྱིས་བྱུང་གི་སྡོམ་པ་འབོག་ཆོག་མ་ནོར་བ་སུས་བྱས་ཀྱང་དེའི་སྟེང་ནས་ཕོག་ཆོག་པ་ཡིན་ཏེ། རྒྱུད་ལ་སྐྱེས་པའི་སྨོན་འཇུག་རང་གི་ངོ་བོ་ལ་ཁྱད་པར་མེད་པའི་ཕྱིར། དཔེར་ན་ཆོས་ཀྱི་རྗེས། ཧོར་ཡུལ་དུ་ཐུབ་པ་དགོངས་གསལ་བརྩམས་ནས། བོད་དུ་བསྐུར་བ་དེའི་ཚིག་དོན་རྣམས་སློབ་མས་བཤད་ཆོག་པར་གསུངས་པ་བཞིན་ནོ། །གཉིས་པ་ནི། རྗེ་བཙུན་ཆེན་པོ་ལས་སེམས་བསྐྱེད་ཀྱི་སྡོམ་པ་ཐོབ་ལ་མ་ཉམས་པའི་རྡོ་རྗེ་སློབ་དཔོན་ཕྱི་མ་རྣམས་ཆོས་ཅན་རྗེ་བཙུན་གྱི་མཛད་པའི་སེམས་བསྐྱེད་ཀྱི་ཡི་གེ་དེའི་སྟེང་ནས་སློབ་མ་གཞན་ལ་སྡོམ་པ་དེ་ཕོག་ཆོག་པ་ཡིན་ཏེ། རྗེ་བཙུན་ཆེན་པོ་ལས་བརྒྱུད་པའི་སེམས་བསྐྱེད་ཀྱི་སྡོམ་པ་དེ་འདྲ་དེ་ཐོབ་ལ་མ་ཉམས་པའི་རྡོ་རྗེ་སློབ་དཔོན་ཡིན་པའི་ཕྱིར། དཔེར་ན་སློབ་དཔོན་རིན་པོ་ཆེའི་དབང་ཆུའི་ཡི་གེའི་སྟེང་ནས་དབང་བསྐུར་མ་ཞུས་ཀྱང་། ས་སྐྱ་པ་ཆེན་པོ་ལས་དབང་བསྐུར་ཞུས་པའི་རྡོ་རྗེ་སློབ་དཔོན་ཞིག་གིས་སློབ་དཔོན་རིན་པོ་ཆེས་མཛད་པའི་དབང་ཆུས་སྟེང་ནས་སྔགས་སྡོམ་ཕོག་ཆོག་པ་བཞིན་སྟེ། སྙན་བརྒྱུད་ཡི་གེར་བྲིས་པ་ཐམས་ཅད་ལ་འདིས་མཚོན་ནོ། །རྒོལ་བ་གཉིས་པ་ནི། སློབ་མ་བརྒྱ་ཕྲག་མང་པོ་ལ་གྲངས་ངེས་མེད་པར་རྗེས་འཛིན་གྱི་ཆོ་ག་བྱེད་