[A:53a]rnam 'gyur ngom pa'o/ /bshad mdzod ma dang / sga theng ma las bshad pa de ltar kho bo cag gis kyang 'dod pas 'gal ba ci zhig yod/ de dag tu bskyed pa zhes bshad pas rang bzhin gyis grub par 'dod pa dang 'gal lo snyam na/ log rtog de chos lugs 'di las phyir phyogs shing / yid bsrub kyi gsang tshig snying la zhugs pa'i bshes gnyen gzhan la yang skyes nas lus la lha bskyed pa dang lus dkyil gyi khyad par ma phyed ces pa'i sun 'byin gyi dug mda' 'phangs pa'i rjes su khyed kyang 'jug par 'dod pa'o/ /'o na lus dkyil gyi lha rnams dang po nas grub pa gsal 'debs pa yin gyi/ cho ga'i sgo nas gsar du bskyed pa ma yin na/ slob dpon rin po ches bhru~M la sogs pa pho brang lnga'i sa bon du bshad pas/ de'i tshe lha rnams sa bon las bskyed pa phyi bskyed rim dang mthun pa'i bskyed tshul zhig las 'os med do snyam na/ dogs pa de 'dra ba dbang brtul 'ga' zhig la skye srid pa la dgongs nas ngag 'don de ltar mdzad pa yin la/ slob dpon rin po che'i lung de'i don ni bhru~M la sogs pa rnams pho brang lnga'i gtso bo rnams kyi sa bon yin par bstan gyi/ lus dkyil bsgom pa'i tshe sa bon de rnams las bskyed dgos par ma bstan no/ /'o na ci snyam na lam dus kyi rig pa'i dbang lnga'i gtso bor gnas gyur pa lta bu'i tshe rgyu dbang dang mthun par rdo rje'i cho ga gsum las bskyed pa'am/ sa bon las bskyed na bhru~M la sogs pa las bskyed ces pa'i don yin gyi/ lus dkyil bsgom pa'i tshe sa bon bhru~M la sogs pa las bskyed dgos pa'i don min