[A:59a]thal/ de de'i dbye ba yin pa'i phyir/ 'dod na/ rnal 'byor pho mo gnyis ka tshogs pa'i 'khor lo yin par thal/ tshogs 'khor mtshan nyid pa yin pa'i phyir/ khyab ste/ ljon shing las/ rnal 'byor pho mo gnyis ka tshogs na tshogs kyi 'khor lo/ dpa' bo 'ba' zhig tshogs na dpa' bo'i ston mo/ dpa' mo 'ba' zhig tshogs na dpa' mo'i ston mor bshad pa'i phyir/ gzhan yang dpa' bo'i ston mo tshogs 'khor mtshan nyid pa yin na/ phyogs snga ma ni dus khyad par can la dpa' bo'i ston mo tsam yang mi byed ces pa'i yang sgras gang gcod pa yin smra dgos so/ gsum pa ni/ dus khyad par can gyi tshe rab byung gi tshogs ma byas na rtsa ltung 'byung ba 'khrul spong gi dgongs pa yin na/ chos rjes bshad pa'i klu sgrub nas chos rje rang gi bar mtha' dag rtsa ltung can du thal/ dus khyad par can la tshogs 'khor mtshan nyid pa mi mdzad pa'i gang zag yin pa'i phyir/ gtan tshigs grub ste de gnyis kyi zlas phye ba'i tshogs 'khor rjes mthun pa kho na mdzad pa po'i gang zag yin pa'i phyir/ khyab ste/ de dag gi mdzad bya rjes mthun pa kho na yin na mtshan nyid pa yin par 'gal ba'i phyir ro/ /gzhan yang khyod kyis kho bo cag dbang bskur rab gnas sogs kyi tshe dpa' bo'i ston mo tsam yang mi byed pa nges pa can su zhig las thos/ khyod ltar du sha chang dang phyi dro'i kha zas gang 'byor zhig la nang mchod byin rlabs shig byas nas bag med du bsten pa la 'jig rten pa dag 'khrul gzhi bskyed pa'i phyir tshogs 'khor byed do zhes dril chen po sgrog par byed dam/ gal te mi