[A:76a]khyad par phra mo tsam las med pa'i phyir/ yi ge 'di'i lung mkhan chen shes rdor bas ma thob pa sogs thal ror snang ste/ ngor pa yang 'di'i lung mi byed pa'i phyir/ des na spyir rnal 'byor dbang phyug birWa pa dang / khyad par rje btsun rin po ches brgyud pa'i sems bskyed thob la ma nyams pa dag gis 'di'i steng nas gzhan la sems bskyed phog pa la skyon ci yang med cing / phyag len gyi khyad par ches khungs btsun zhing rnam par dag par 'gyur ba yin no/ /rje btsun mchog gis mdzad pa yi/ /brgyud pa gnyis ldan sems bskyed kyi/ /yi ge tsam la'ang zhe sdang pa/ /grags pa'i zhabs kyis ci mdzad dam// ! //smra ba gnyis pa/ slob ma rjes 'dzin dus gcig la nyer lnga las mang ba dang / zung du gyur pa la mi rung ba'i sgrub byed/ dngos gzhi'i grangs nges sta gon la ltos/ sta gon gyi grangs nges rjes 'dzin la ltos pa'i phyir zer ro/ /de ltar na rjes 'dzin la grangs nges mi dgos par thal/ dngos gzhi'i grangs nges sta gon la ma ltos/ sta gon gyi grangs nges rjes 'dzin la ma ltos pa'i phyir/ khyab pa la dngos 'gal/ rtags dang po grub ste/ spyi rgyud las/ sta gon gnas pa byas pa la/ /gal te rkyen gyis ma 'ongs na/ /bla ma blo ldan mkhas pa yis/ /der ni slob ma gzhan mi bzung / /zhes slob ma nyi shu rtsa lnga la sta gon byas pa'i gcig lta bu ma tshang na/ gzhan mi 'jug par nyer bzhi la dbang bskur bas chog par bshad pa'i phyir/ gnyis pa grub ste/ slob ma yongs su bzung ba gang / /sta gon gnas tshe med na ni/ /de