[A:༧༦ན]ཁྱད་པར་ཕྲ་མོ་ཙམ་ལས་མེད་པའི་ཕྱིར། ཡི་གེ་འདིའི་ལུང་མཁན་ཆེན་ཤེས་རྡོར་བས་མ་ཐོབ་པ་སོགས་ཐལ་རོར་སྣང་སྟེ། ངོར་པ་ཡང་འདིའི་ལུང་མི་བྱེད་པའི་ཕྱིར། དེས་ན་སྤྱིར་རྣལ་འབྱོར་དབང་ཕྱུག་བིརྺ་པ་དང་། ཁྱད་པར་རྗེ་བཙུན་རིན་པོ་ཆེས་བརྒྱུད་པའི་སེམས་བསྐྱེད་ཐོབ་ལ་མ་ཉམས་པ་དག་གིས་འདིའི་སྟེང་ནས་གཞན་ལ་སེམས་བསྐྱེད་ཕོག་པ་ལ་སྐྱོན་ཅི་ཡང་མེད་ཅིང་། ཕྱག་ལེན་གྱི་ཁྱད་པར་ཆེས་ཁུངས་བཙུན་ཞིང་རྣམ་པར་དག་པར་འགྱུར་བ་ཡིན་ནོ། །རྗེ་བཙུན་མཆོག་གིས་མཛད་པ་ཡི། །བརྒྱུད་པ་གཉིས་ལྡན་སེམས་བསྐྱེད་ཀྱི། །ཡི་གེ་ཙམ་ལའང་ཞེ་སྡང་པ། །གྲགས་པའི་ཞབས་ཀྱིས་ཅི་མཛད་དམ།། ༈ །།སྨྲ་བ་གཉིས་པ། སློབ་མ་རྗེས་འཛིན་དུས་གཅིག་ལ་ཉེར་ལྔ་ལས་མང་བ་དང་། ཟུང་དུ་གྱུར་པ་ལ་མི་རུང་བའི་སྒྲུབ་བྱེད། དངོས་གཞིའི་གྲངས་ངེས་སྟ་གོན་ལ་ལྟོས། སྟ་གོན་གྱི་གྲངས་ངེས་རྗེས་འཛིན་ལ་ལྟོས་པའི་ཕྱིར་ཟེར་རོ། །དེ་ལྟར་ན་རྗེས་འཛིན་ལ་གྲངས་ངེས་མི་དགོས་པར་ཐལ། དངོས་གཞིའི་གྲངས་ངེས་སྟ་གོན་ལ་མ་ལྟོས། སྟ་གོན་གྱི་གྲངས་ངེས་རྗེས་འཛིན་ལ་མ་ལྟོས་པའི་ཕྱིར། ཁྱབ་པ་ལ་དངོས་འགལ། རྟགས་དང་པོ་གྲུབ་སྟེ། སྤྱི་རྒྱུད་ལས། སྟ་གོན་གནས་པ་བྱས་པ་ལ། །གལ་ཏེ་རྐྱེན་གྱིས་མ་འོངས་ན། །བླ་མ་བློ་ལྡན་མཁས་པ་ཡིས། །དེར་ནི་སློབ་མ་གཞན་མི་བཟུང་། །ཞེས་སློབ་མ་ཉི་ཤུ་རྩ་ལྔ་ལ་སྟ་གོན་བྱས་པའི་གཅིག་ལྟ་བུ་མ་ཚང་ན། གཞན་མི་འཇུག་པར་ཉེར་བཞི་ལ་དབང་བསྐུར་བས་ཆོག་པར་བཤད་པའི་ཕྱིར། གཉིས་པ་གྲུབ་སྟེ། སློབ་མ་ཡོངས་སུ་བཟུང་བ་གང་། །སྟ་གོན་གནས་ཚེ་མེད་ན་ནི། །དེ་