[A:76b]yi gzugs brnyan byas nas ni/ /ji skad gsungs ba'i las rnams bya/ /zhes rjes 'dzin la yod pa'i slob ma sta gon dus shi na gzugs brnyan gyi byang bu la sta gon bya ba dang / slob ma yongs su bzung ba gang / /gal te rkyen 'ga' zhig gis ni/ /der ni 'ong par ma gyur na/ /gzhan zhig de yi skyin por gzhug /ces phyogs gzhan du song nas ma sleb pa lta bu la de'i tshab gzhan zhig la sta gon byed par bshad cing / de gnyis la rjes 'dzin dgos par ma bshad pa'i phyir/ des na gsang ba spyi rgyud kyi lung gi dngos bstan gyi dgongs pa nyer lnga las mi mang ba la rjes 'dzin byed pa ni/ dbang tshar gcig bskur ba lta bu la dgongs pa yin no/ /rig pa'i gnad dang mi ldan par/ /mang po'i lung gi chal chol gyis/ /srin bu'i kha chu ji bzhin du/ /rang nyid dam du ma bcings sam// ! //smra ba gsum pa/ nub dang po la sa lha/ bum pa sta gon byas pa'i nub de kho na la slob ma sta gon byed kyi/ nub phyi ma phan chod kyi rdul tshon gyi dkyil 'khor dang 'brel bar slob ma sta gon byar mi rung ste/ de'i dus kyi slob ma sta gon dang / sta gon snga ma gsum la 'brel med pa'i phyir zer ro/ /de ltar na nub phyi ma rnams la dngos gzhi'i bsgrub mchod kyang byed mi rung bar 'gyur te/ de dus kyi dngos gzhi'i bsgrub mchod la sta gon snga ma gsum dgos pa gang zhig de med par ma zad de dang 'brel tsam yang med pa'i phyir/ gzhan yang dkyil 'khor gcig tu dbang lan gcig las bskur du mi rung na ras bris kyi dkyil 'khor la'ang mtshungs pa'i phyir dang / mi mtshungs te rdul tshon