[A:87b]par lan 'debs 'di skad du/ ljon shing las bshad tshogs 'khor gyi/ /dbye bas sa lugs khyab na ni/ /dpa' bo'i ston mo'ang der 'gyur ro/ /de ni 'khor gsum lan med yin/ /dbye ba thams cad dngos yin na/ /rnal 'byor pho mo tshogs par 'gyur/ /rab byung tshogs 'khor ma byas na/ /rtsa ltung 'byung na klu sgrub sogs/ /rtsa ltung can du thal bar 'gyur/ /dbye ba thams cad dbye gzhi ru/ /nges par 'dod na bden gnyis kyi/ /dbye gzhi 'jig rten blo tsam dang / /shes byar don dam bden pa dang / /khyod kyis khas len dgos zhes zer/ /'dod lan thebs pa'i thal 'gyur la/ /'khor gsum rigs pa shes pas khrel/ /pho mo tshogs pa rnam gnyis te/ /gang zag phal la grags pa dang / /rdor sems bsgom pa'i ting 'dzin gyi/ /lha dgu la sogs dkyil 'khor dang / /dpa' bo dpa' mo rnams kyang yod/ /de lta min na tshogs 'khor gyi/ /tshim pa lnga yang dka' bar gnas/ /rtsa khams dpa' bo dpa' mo ru/ /gdod nas grub par khyod nyid 'dod/ /gzhan yang tshogs 'khor rtsod spong las/ /phyi nang mkha' 'gro zhes kyang gsungs/ /rtsa ltung 'byung dang mi 'byung ba/ /klu sgrub la sogs sdom las grol/ /de lta min na de bzhin 'byung / /'on kyang lugs gnyis so sor nges/ /bu ram phyi dror 'dod pa dang / /mi 'dod 'gal ba med pa bzhin/ /gcig tu nges na ha cang thal/ /don dam shes byar khas len pas/ /dpe de da dung bsgrub bya yin/ /gzhan yang spros pa 'di skad zer/ /tshogs 'khor mtshan nyid rjes mthun pa/ /drug pa dngos su