[A:93b]kyi rgyur 'gyur bar bya ba'i phyir slob ma tshad med pa bzung bar bya'o/ /zhes dang / de dbang bskur la grangs nges mi dgos pa'i dmigs gsal lo snyam na/ gcig shes kyang dbang bskur la grangs nges dgos pa'i dmigs gsal lo/ /min te/ slob dpon rin po ches dbang chur/ rjes 'dzin gyi skabs su drangs pas so zhe na/ drangs ma thag pa'i lung phyi ma de yang 'phags pa'i brtag gnyis kyi TIkka snying po gsal bar/ rjes 'dzin gyi skabs su drangs pas kun tu mtshungs so/ /zhes dang / rigs pa ni rdo rje slob dpon gyi dbang slob ma re re nas byed pa de'i tshe'ang maNDal 'bul ba dang gsol ba gdab pa sogs slob ma ji tsam yod pa thams cad kyi cig car du bya rung bar bshad pa'i rigs pas so/ /dbang bskur la grangs nges yod kyang / rjes 'dzin gyi tshe de ma byas pa la nyes pa med par shes pa yin/ zhes dang / kho bo cag gi rang lugs ni/ 'phags pa rin po che'i rtsa rgyud kyi TIkka dang / spyi rgyud dgongs pas grangs nges yod pa dang / rnam snang mngon byang gi dgongs pas grangs nges med pa gnyis char slob ma rjes 'dzin gyi skabs 'di nyid du bshad pas/ gnyis ka ltar yang mi 'gal ba nyid du 'dod do zhes lan 'debs par mdzad do/ /legs par rna ba bklags te gsan pa zhu/ spyi rgyud nas bshad pa'i rjes 'dzin gyi rnam gzhag de khyod la med par thal/ ji skad du bshad pa'i lag len de dag khyod la med pa'i phyir/ rtags gsal dngos/ lam 'bras nas bshad pa'i rjes 'dzin gyi rnam gzhag de khyod la med par thal/ ji skad du bshad pa'i grangs nges