[A:93a]su/ las kun byed pa'i gsang sngags kyis/ /de nas slob ma yongs su bzung / /bu mo gzhon nu'i bkal ba'i skud/ /blangs nas bzhi bcu rtsa dgu bzlas/ /slob ma rnams ni blos bsam nas/ /mnyam par gzhag pas mdud pa bor/ /de ltar slob ma yongs bzung na/ /las la bgegs ni med par 'gyur/ /zhes pa slob ma rjes 'dzin dngos bstan/ /ces dang / mkhas pas slob ma gcig gam gsum/ /zhes pa nas/ sta gon gnas par brtsams par bya/ /zhes pa'i bar gyis slob ma'i grangs dang lus kyi spyod lam bstan/ ces pa dang / gnyis pa ni dbang chur dbang bskur don du gnyer ba'i slob ma la/ sngags gsang sngags la zhugs pa dang / theg chen gyi sgor zhugs pa dang / zhes sogs lugs srol tha dad du brjod nas/ rgol ba khyod kyi rjes bzung ni lag len de bshad ma thag pa gnyis po gang yin/ zhes skyon brjod nas kho bo cag gi rjes 'dzin gyi rnam gzhag rje btsun gong mas bshad pa de ltar 'dod la/ zhes pa dang / de lta na yang dbang chu'i dngos bstan dang 'gal lo snyam pa'i tsher ma khong du sbed dgos pa ma yin te/ der grangs nges bshad pa de spyi khyab tu sbyar mi dgos pas nyes pa de shin tu spangs pa'i phyir ro/ /ji ltar na lung dang rigs pa gnyis kyi sgo nas so/ lung ni rnam snang mngon byang las/ gcig gnyis bzhi las lhag kyang rung / /spyad mi dgos par bzung bar bya/ /zhes dang / slob dpon snying rje chen po dang ldan pas sems can gyi khams ma lus pa bsgral ba'i dbang du byas te/ byang chub