[A:101b]pas rang rigs kyis rgyas btab pa yang yin la/ rdo rje sems dpas rgyas btab pa yang yin pas don gcig pa yin no zhes bya ba 'dis ni legs par grub pas rtsod pa'i gzhi lha'i lam la dbang po'i gzhu bzhin du dengs par gyur to/ /phyogs snga ma'i rjes su zlos pa shes pa yang ngo mtshar che mod/ des kyang da dung skabs don 'grub pa ma yin te/ sras don ma'i rgyas btab ni/ rgyas btab rdzogs pa'i skabs la dgongs pas 'phags pa'i lugs ltar bya dgos te/ snyan brgyud kyi skabs tha dad pa yin pa'i phyir/ man ngag dang ldan pa'i bshes gnyen la gtugs shig bza' ba'i dam tshig gi skabs su mang du smras nas/ mdor na tshogs 'khor mtshan nyid pa dang rjes mthun par 'jog pa'i rgyu mtshan ni/ tshim pa drug pa dngos byar yod med kyi khyad par las rab tu phye ba yin la/ de ltar yin pa de'i phyir/ las rgya la brten nas rdzogs rim gyi ye shes dngos su skye ste/ lus sems lhan skyes kyi bde bas tshim par bya nus pa'i rnal 'byor pa kho nas tshogs 'khor bya ba dang / de 'dra ba'i nus pa med pas zhes mi rung ba'i sgrub byed 'god do/ /de la 'di 'dri bar bya ste/ khyed kyi dbang bskur ba de dbang bskur mtshan nyid pa yin nam/ rjes mthun pa yin/ mtshan nyid pa yin na rab tu byung bas dbang bskur mtshan nyid pa byar rung ba ma yin te/ dbang bskur mtshan nyid pa dang / rjes mthun par 'jog pa'i rgyu mtshan ni/ las kyi phyag rgya'am/ tshim pa drug pa dngos byar yod med kyi khyad par las rab tu phye ba yin la/ de ltar yin pa de'i phyir las rgya la brten nas rdzogs rim gyi ye