[A:104a]pa
yin no/ /lung phyi ma'i don ni/ tshogs 'khor gyi tshul rnams shin tu gsang zhing sbas par bya ba dang / gsang spyod zab mo bag yengs su mi 'gyur ba'i phyir gang thod du bya ba bkag pa yin te/ dge slong rnams la zhes sogs ni dngos su dgongs pa yin te/ de ltar ma yin na dge slong ni/ sngags kyi rnal 'byor pa mchog tu gsungs pa sogs mi 'grig pa du ma yod pa'i phyir ro/ /des na rnam dpyod kyi shes rab dang ldan pa'i shes par nus kyi/ gzhan dag gi lung sbyor mkhas pa'i bzhad gad kyi gnas yin no/ /gzhan du na rdo rje theg pa'i dbang bzhi blang ba dang / lam bzhi bsgom pa sogs/ khyod rjes 'brang dang bcas pa rnams kyi nyams len du mi rung zhing / dgag bya yin par thal te/ gsang ba shes rab dbang bskur ni/ /tshangs par spyod pas blang mi bya/ /gal te dbang bskur de 'dzin na/ /bkag pa spyad par gyur pa'i phyir/ /dka' thub sdom pa de nyams te/ /brtul zhugs can de pham pa yin/ /ltung ba dag ni byung gyur nas/ /de ni ngan song nges ltung bas/ /grub pa nam yang yod ma yin/ /zhes gsungs pa'i phyir/ khyod kyi lung sbyor thams cad 'di dang 'dra bas 'chad rtsod rtsom pa'i khur 'di re zhig bzhag na legs pa yin no/ /des na bshad par bya ste/ rje btsun chen po'i zhal nas/ de la sangs rgyas thob pa'i rgyu/ /bsod nams ye shes tshogs yin te/ /tshogs las dngos grub mchog tu 'gyur/ /de phyir rtag tu tshogs bsag bya/ /ye shes mngon par rtogs pa ste/ /bsod nams rnam pa mang yod kyang / /rang gi