[A:105b]zhal nas kyang / 'di 'dra dman pa thams cad kyi/ /yul las shin tu 'das pa ste/ /bde bas byang chub sgrub byed pa/ /de 'dra rgyud kyi snying po yin/ /zhes dang / dbang thob cing dam tshig sdom par ldan pa rnams tshogs la zhes/ rab tu myos pa'i chang mi btung / chags sdang gi gtam mi bya/ kha drag dang rtsod pa mi byed ces gsungs na/ sbyang rtogs sbar gsum nus pa'i rnal 'byor pa la/ bslab bya de 'dra ba ci dgos te/ khyad par gyi dam tshig snub par byed pa'i than skad yin no/ /gzhan yang lam 'dir zhugs pa'i rab byung sogs kyis 'di nas bshad pa'i tshogs kyi 'khor lo bya rung ba yin te/ 'di nas gsungs pa'i rnal 'byor pa yin pa'i phyir/ smras pa/ snyan brgyud nam mkha'i nor bu 'di/ /rang bzo'i sprin gyis ma sgrib par/ /rnam dpyod blo gros padmo'i tshal/ /'od zer rgyas pas phye zhig ang / /tshig tsam bklags pas mi 'khrol zhing / khrol yang de yi lag len med/ /lag len shes kyang brgyud pas dben/ /brgyud ldan bla ma sten cig ang / /grub pa'i mtha' la chags sdang zhing / /rang bzo'i tshig gis mkhas rlom nas/ /mngon pa'i nga rgyal cher 'dzin na/ /brgyud pa'i byin rlabs med do ang / /de ltar brgal zhing brtags la chags sdang dbang gis nongs par gyur snyam bdag la med/ /bla ma'i drin las rang gi blo gros cung zad kha phye rgyas phyir 'di bris mod/ /gzur gnas blo ldan skye bo ma mthong de phyir gzhan la phan snyam bdag la med/ /'gal 'khrul mchis dang nongs pa'i tshig shor mkhas dang phyogs snga smra la bzod par gsol/