[A:106b]blo mig rab tu gsal ba gang gis bkod pa'i rje btsun sa skya pa'i tshogs kyi 'khor lo'i dgag lan log rtog brag ri 'joms pa'i rdo rje zhes bya ba las 'di ltar 'byung ste/ oM swasti siddhaM/ dus gsum gyi rgyal ba thams cad 'dus pa'i ngo bo rje btsun dpal ldan bla ma dam pa'i zhabs la gus pas phyag 'tshal zhing skyabs su mchi'o/ /brtse ba chen pos rjes su gzung du gsol/ 'dir rdo rje gdan pa chen po kun dga' rnam rgyal ba de nyid kyi rang nyid lta ba dang spyod pa mthon por phyin pa'i spyod pa dang phyag len rnams rjes 'jug gi skye bo las dang po pa rnams la yang de bzhin du ston par mdzad cing / khyad par du yang tshogs kyi 'khor lo'i tshul lung dang rigs pa du ma'i sgo nas dgag bsgrub kyi rnam gzhag mang du ston pa tshogs kyi 'khor lo'i rnam gzhag grub pa'i dga' ston zhes bya ba mdzad 'dug pa la brten nas rjes 'jug gi skye bo rtog spyod kyi blo gros kyis rgyud dben zhing phyogs 'dzin phrag dog gi dri mas rgyud dkrugs pa rnams kyis kyang / mchog 'dzin gyi lta bas kun nas blangs te ri bong cal gyi rjes su 'brang ba ltar gzhan gyi grub mtha' dang phyag len rnam par dag pa rnams khyad du bsad de skyes bu dam pa rnams la zhe sdang bar byed pa ni sdig pa'i khur lci zhing bstan pa la gnod par bsam ste/ 'dir gzu bor gnas pa'i blos dpyad pa'i sgo nas 'thad pa dang mi 'thad pa'i cha rang gi rnam rtog la shar ba rags rim tsam yi ger bri bar bya'o/ /'di la dgag pa mdor bstan gyi lan bshad pa dang / dgag pa rgyas bshad kyi lan bshad pa gnyis/ dang po la dgag pa'i lung drangs pa