[A:107a]dang / de'i lan bshad pa gnyis/ dang po ni/ rdo rje gdan pa chen po de nyid kyis mdzad pa'i tshogs kyi 'khor lo'i rnam gzhag grub pa'i dga' ston zhes bya ba las/ tshogs kyi 'khor lo bsten dgos pa/ ma bsten pa'i nyes dmigs/ bsten tshul dngos dang gsum du mdzad nas/ gsum pa bsten tshul dngos la/ bsten tshul la log par rtog pa dgag pa/ yang dag pa'i brten tshul bshad pa/ don bsdus te bstan pa gsum gyi/ dang po la mdor bstan rgyas bshad gnyis kyi/ dang po ni/ ding sang gi dus 'dir rdo rje slob dpon rdzas la rkam pa dang / longs spyod la chags pa 'gas/ rang gi rnyed bkur gyi ched du snod kyi skyon yon ma brtags pa theg pa ches dman pa'i rigs can la dbang bzhi bskur te/ zab mo'i gnas rnams bstan pa las/ phyis de dag rang gi goms pa'i blos brtags pa na nyams len dman pa nyid mchog tu mthong ste/ gong ma rnams de'i phyogs su ma smon par byed pa/ dper na tshogs kyi 'khor lo bsten du rung mi rung so thar gyi 'dul ba'i ngos nas 'jog pa bzhin no/ /des ni 'dod yon bsten pa lam du byed pa rdo rje theg pa las/ 'dod yon spong ba lam du byed pa theg pa gzhan khyad du 'phags pa rang don gyi 'dod pas gang zag de ni sngags lam spangs pa'i sngags pa ste nor gyis 'phongs pa'i phyug po bzhin no/ /des na de lta bu rjes 'brang dang bcas pas lta ba tshogs kyi 'khor lo nyid sngags pa ngan 'gror 'jug pa'i sgor bsam pa ni/ ltung ba can rnams ltung med du bsgom zhing / ltung med rnams ltung ba la sbyor