[A:110b]la mi rton gang zag la rton pa'i dus 'dir ches dad pas 'di bas kyang phyogs su lhung ba'i gdul bya chen po mi 'byung re skan zhes pa'i bar la sogs pa skur 'debs dang dgag pa mang du byed do/ /gnyis pa de'i lan bshad pa la/ dgag pa de thams cad ni phyogs snga gzhi med la smyon gtam gyi dgag pa dang skur pa brjod pa'i ngal ba 'ba' zhig tu zad de/ 'jig rten pa'i dga' ston dang / 'jig rten pa'i kha zas yin na tshogs kyi 'khor lo'i rgyur mi rung bas khyab pa dang / sha chang rab tu byung ba'i tshogs 'khor gyi dus su brten par gtan nas mi rigs par 'dod pa med bzhin du de la dgag pa sna tshogs brjod pa'i phyir/ gal te kho na re/ de ltar ngor pa khyod kyis 'dod de/ kun bzang rnam rol las/ sha chang kho na la longs spyod pa 'jig rten pa'i dga' ston la tshogs kyi 'khor lo'i ming gdags par mi bya'o/ /zhes pas de ltar bstan pa'i phyir/ zhe na gtan tshigs ma grub ste/ lung de'i don ni/ thar pa don gnyer rnams kyis sha chang kho na la longs spyod pa 'jig rten pa'i dga' ston dang tshul mtshungs pa'i longs spyod la tshogs 'khor gyi ming btags nas bag med du longs spyad par mi bya zhes pa'i don yin gyi/ 'jig rten pa'i kha zas su rung ba yin na/ tshogs 'khor gyi rgyur mi rung bas khyab pa'i don du phyogs tsam yang ma song ba'i phyir ro/ /de la gzhan du na khyed nyid la skyon du ma gnas te 'di ltar bla med kyi lam du zhugs pa'i dge slong rdo rje 'dzin pa yin na/ rang gi spang byar gyur pa'i 'dod pa'i yon tan med pas khyab par thal/ de yin na 'dod pa'i yon tan thams cad