[A:113b]kyis kun nas bslangs pa zhig dgos pa'i phyir ro/ /gal te kho na re/ tshogs 'khor gyi skabs su yang sha chang sogs la sred pa'i sgo nas bza' ba ma yin par/ lha mchod pa'i bsam pas tshogs rdzogs pa'i ched yin pa'i phyir na kun tu mtshungs so zhe na/ mi mtshungs te/ tshogs 'khor gyi skabs su dge slong rdo rje 'dzin pas sha chang sogs cung zad tsam ni longs spyod par nged kyang 'dod la/ mang du longs spyad na myos pa sogs kyi sgo nas dran pa dang shes bzhin nyams nas bag med kyi spyod par 'gyur ba dang / gzhan ma dad pa sogs log lta'i rgyur song nas mang du longs spyod pa de bkag pa yin la/ dbang gsum pa'i skabs su chags pa'i gtam smras pa tsam gyis dran shes nyams nas bag med kyi spyod par mi 'gyur zhing / gzhan ma dad pa sogs su mi 'gyur ba'i phyir ro/ /sngon gyi dus kyang dge slong dang dge tshul rdo rje 'dzin pa rnams kyis dbang gsum pa'i nyams len bya bar mi rung zhes pa'i log rtog smra ba gangs can 'dir byung ba la bla ma gong ma rnams kyis lung rigs kyis sun phyung zin no/ /dam bzhag gi skabs su de ltar smras pas rdzun smra'i pham par mi 'gyur te/ nyan thos lugs kyi rdzun smra'i pham par 'gyur ba la/ 'du shes gzhan du bsgyur ba'i sgo nas dran shes bzhin gyis zin pa zhig dgos kyi/ shes bzhin gyis ma zin pa dang mngon pa'i nga rgyal gyis de ltar smras pa la pham par mi 'gyur ba'i phyir ro/ /rdo rje theg pa'i skabs su ni sbyor dngos rjes gsum tshang ba'i sgo nas rang nyid sangs rgyas su bskyed pa'i sgo nas rang nyid sangs rgyas su zhen pa'i ngang nas