[A:114a]de ltar smras pa la pham par ga la 'gyur legs par soms shig gnyis pa gsang ba kun rgyan las byung ba dgag pa'i lan bshad pa la/ dgag pa'i lung drangs pa dang / de'i lan bshad pa gnyis/ dang po ni/ yang de nyid du/ gnyis pa gsang ba kun rgyan las 'byung ba dgag pa la/ 'dod pa brjod pa dang / de dgag pa gnyis kyi/ dang po ni/ de nyid du/ 'dir rab tu byung ba sdom brtson rnams kyis tshogs 'khor byed na/ gong 'og gi cho ga rnams 'dra ba las/ dam tshig blangs te lce la reg pa tsam bya/ bu ram dang / sbrang rtsi dang / zhun mar rnams sha lnga bdud rtsi lngar byin gyis brlabs la nang gi sbyin sreg gi tshul gyis bza'o/ /rnal 'byor pa rnams kyis kyang dam tshig gi rdzas la ran par longs spyod cing / chang myos par 'thung ba dang / kha zas ha cang rgyags par longs spyod pa ni tshogs 'khor gyi skabs kyi dgag bya yin la/ khyad par bsad sha la longs spyod pa ni theg pa chen po'i mdo rgyud thams cad las bkag pas/ dgra nag dang / a ra li'i rgyud la sogs pa nas bshad pa ltar ba glang sogs shi ba'i sha kho na dam rdzas su bzung ngo / /de ltar mchod pa dang longs spyod la tshim pa longs spyod/ zas la bcas ming gdags par mang du bza'/ skom ji snyed pa btung zhes pa nas/ rgyud 'grel dang tshogs 'khor gyi gzhung mtha' dag la nan tan du bya zhes pa'i bar phyogs sngar bkod nas/ gnyis pa de dgag pa ni/ skyes bu gang dag gzhan la zhe sdang bzhin du chang gis myos pa na smra ba thams cad la go rim med