[A:126b]gzhag ma yin na/ gnad kyi gsal byed du/ yang na ye shes ni rnam pa lnga ste/ rdo rje 'dis rtse mo lnga pa'i rnam par dag pa'ang shes par 'gyur ro/ /zhes bla ma rnams gsungs so/ /zhes dpyad pa'i 'grel pa de yang rnam dag ma yin par 'gyur ba'i phyir dang / gnad kyi gsal byed du/ lha'i rnam dag sbyar ba dang mi mthun pas ma yin na/ dbang chu chen mor/ de la de bzhin gshegs pa lnga dang / yum lnga dang / byang chub sems dpa' dang / lha mo la sogs pa rdo rje'i de kho na nyid ltar yongs su rdzogs par mos pa bskyed la/ zhes gsungs pas dbang chu de yang rnam dag ma yin par 'gyur ba'i phyir ro/ /de'i phyir rngog pa'i rjes 'brang dag gi yi ge'o zhes 'chad pa ni/ gzhan rang gi tshig la yid ches bskyed par byed pa'i zol tsam mo/ /gnyis pa dbang po rab 'bring gsum gyi dkri ba'i gzhung shing bkar bsgrub pa ni/ rjes 'brang kha cig gi dang por lam 'bras kyi sngon 'gro'i tshig bkag pas/ phyis su yi ge 'di nyid dang 'gal bar mthong ste/ rang gi grub pa'i mtha' la mi gnod par bya ba'i phyir/ rje btsun gyi gsung ma yin zhes dgag pa brjod par byed mod/ de yang shin tu mi 'thad de/ rje btsun gyi dkar chag gi yi ge las/ 'o na glegs bam dang dkar chag 'di ci'i phyir bri zhe na/ gzhan don 'ba' zhig gi phyir te/ 'ga' zhig ci zin zin gyi ngan rtog bris te khyer nas 'ong pa yang mthong / 'ga' zhig rje bla mas ma mdzad par mdzad do zer ba yang mthong / glegs bam 'di nyid kyi nang du rang gi ngan rtog bcug pa'ang mthong nas brtse ba'i phyir dkar chag tu