[A:13b]gcig ste gnyis su mdzad nas/ phyi ma rtsal du bton pa ni gtan ma yin te/ bshad tshul gong 'og gnyis po de la de tsam gyis khyad par 'byed pa'i dmigs bsal dang don thob ci yang mi snang ba dang / spyir snang ba gsum gyi sngon du dbang bskur ba mdzad pa'i phyag len de gdul bya'i gang zag la ltos nas byar rung ba'i skabs du ma yod kyang / de tsam gyi snang ba gsum gyi sngon du dbang bskur nges par byed dgos par bsgrub par mi nus shing / nus kyang 'chad tshul de rdo rje theg pa'i rgyud gzhung nas bshad pa'i skal ldan gcig car ba dang / skal dman rim 'jug pa'i lam gnyis po gang yin brtags na phyogs gnyis po gang du yang khas len nus pa dka' bar snang zhing / gzhung ji lta ba bzhin du dkri ba'i gzhung shing gi babs dang / phyag len gyi rim pa de gnyis 'grig pa yang shin tu dka' bas/ gzhung ji lta ba bzhin du dkri ba'i gzhung shing dngos la go rim nges pa can de lta bu zhig nges par dgos par bzhed par mchis lags/ de lta na gsang ba sgo 'byed las/ dang po nyid nas dam tshig ma thob ba thob par byed pa mngon par dbang bskur ba bshad pa ma yin nam/ zhe na/ yin mod/ des de ltar bstan par mtha' gcig tu nges pa ma yin te/ dam tshig ma thob pa thob par byed pa la dbang gi mngon par rtogs pa brgyad dang ldan pa'i sgo nas rdul tshon gyi dkyil 'khor du smin byed kyi dbang bskur ba tshul bzhin du bsgrub dgos pa yin la/ dbang bskur zhu ba po'i slob ma de la yang rigs legs par brtags te/ skal ldan cig car ba'i rigs can yin na thun mong ba'i lam