[A:18b]sdom pa len pa dang gso ba gnyis ka la bla ma dgos pa'i nges pa med ces kun gyis 'chad pa dang / byang sa'i dgongs pas/ len pa la nges par dgos pa dang / gso ba la nges pa med ces zhal 'cham pa dang / spyir birWa pa nas brgyud pa bar ma chad pa'i smon 'jug gi sdom pa zhig yod par mi 'dod na ni shin tu tha chad la/ yod par 'dod na ni de 'dra rgyud la yod pa'i rdo rje slob dpon des/ phyis byung gi sdom pa 'bog chog ma nor ba sus byas kyang de'i steng nas phog chog pa yin te/ rgyud la skyes pa'i smon 'jug rang gi ngo bo la khyad par med pa'i phyir/ dper na chos kyi rjes/ hor yul du thub pa dgongs gsal brtsams nas/ bod du bskur ba de'i tshig don rnams slob mas bshad chog par gsungs pa bzhin no/ /gnyis pa ni/ rje btsun chen po las sems bskyed kyi sdom pa thob la ma nyams pa'i rdo rje slob dpon phyi ma rnams chos can rje btsun gyi mdzad pa'i sems bskyed kyi yi ge de'i steng nas slob ma gzhan la sdom pa de phog chog pa yin te/ rje btsun chen po las brgyud pa'i sems bskyed kyi sdom pa de 'dra de thob la ma nyams pa'i rdo rje slob dpon yin pa'i phyir/ dper na slob dpon rin po che'i dbang chu'i yi ge'i steng nas dbang bskur ma zhus kyang / sa skya pa chen po las dbang bskur zhus pa'i rdo rje slob dpon zhig gis slob dpon rin po ches mdzad pa'i dbang chus steng nas sngags sdom phog chog pa bzhin ste/ snyan brgyud yi ger bris pa thams cad la 'dis mtshon no/ /rgol ba gnyis pa ni/ slob ma brgya phrag mang po la grangs nges med par rjes 'dzin gyi cho ga byed