[A:20a]ma'am/ gcig pu de la brten kyang rung / de la dgos pa'i yo byad rnams thun mong du bsgrubs pas/ tshogs rdzogs pa dang bsag sbyang 'phel ba dang / sgrub pa po kha cig gnas gzhan du mi 'khyar ba sogs dgos pa shin tu mang ngo / /de ltar yin pa de'i phyir/ spyi rgyud nas bshad pa'i rjes 'dzin dang / rje bla ma'i phyag len gyi srol las byung ba'i rjes 'dzin gyi khyad par ni/ rjes 'dzin gyi rtogs pa ma skyes par byed pa la grangs nges dgos pa dang / skyes zin brtan por byed pa la grangs nges mi dgos pa'i khyad par gyi rab tu phye'o/ /de ltar na yang dbang chu'i dngos bstan dang 'gal lo snyam pa'i tsher ma khong du sbed dgos pa ma yin te/ dbang chu'i lung 'di ni lam 'bras gzhung ji lta ba bzhin du khrid pa'i rgyu dus kyi dbang kho na'i dbang du mdzad pa ma yin pa'i phyir/ gzhan du na ras bris kyis kyang chog pa nyid du khyed la thal bar 'gyur ro/ /gnyis pa ni/ gal te 'o na khyed la gong du rtogs pa skyes zin de las gzhan pa'i rjes 'dzin gyi don yod dam med/ med na ni sems bskyed kyi rjes 'dzin gyi cho ga zhig byed pa de/ grub zin bsgrub pas zlos pa'i skyon can du 'gyur la/ gal te yod na/ spyi rgyud las bshad pa de yang ma yin/ gong du bshad pa de yang ma yin pa'i rjes 'dzin zhig yod dgos so zhe na/ 'di la gnyis te/ cho ga'i ming gis mtshams sbyor dgos par bstan/ rjes 'dzin dngos gzhi ni slob ma sta gon nyid yin par bstan pa'o/ /dang po ni/ sems bskyed chen mo byas pa'i phyi nyin de/ rjes 'dzin gyi phyag len ji lta ba bzhin du byed