[A:22a]khyed kyi rgyud don ji ltar 'chad ce na/ kho bo cag ni rgyud las/ rkyen gyi 'ga' zhig ma 'ong na/ /zhes pa de gzhir bzhag nas/ rkyen dgos kyi tshe kha 'cham la dbang bskur byas chog pa dang / rjes bzung gi cho ga'i khongs su mi gtogs kyang / rjes bzung gi yon tan dang ldan pa gzhan dag la/ sta gon byas nas dbang bskur chog pa'i don du 'chad la/ khyed kyis ni dmigs bsal med par rgyud kyi dngos bstan spyi khyab la sbyar nas 'chad tshul 'dra ba ma yin no/ /bye brag tu gzugs brnyan la sta gon byas pa ni/ slob ma 'ga' zhig tshe'i dus byas pa la dgongs te/ slob dpon snying rje chen po dang ldan pas gzugs brnyan de la dbang bskur ba yang mdzad pa'i don 'di la bsam nas bod du/ rjes bzung gi slob ma yul gzhan du song ba'am/ btson du tshud pa'am/ lus srog dang tshangs spyod kyi bar chad byung dogs pa'i tshe gzugs brnyan la de'i shes pa bkug nas dbang bskur byed pa sogs kyi lag len byung bar snang ngo / /'di dang 'dra ba zhig gi skabs las brtsams te/ bro pa'i mkhan po rnal 'byor byang seng gis/ rje btsun chen po la dris pa'i lan du/ gson la bum pa 'cha' ba de/ /zhes sogs gsungs par snang ngo / /gnyis pa lam 'bras 'chad tshul dang 'gal ba ni/ khyed cag gi rje bla ma dam pa'i dgongs par byas/ rdo rje slob dpon 'ga' zhig gi drung du gsung ngag rin po che gzhung ji lta ba bzhin du dkri ba'i khrid don du gnyer ba dag 'ong pa na/ thog ma kho nar dbang bskur ba dang / dam tshig dang ldan par byed dgos pa nyid du